Марко Бицари, долгогодишниот извршен директор на „Гучи“, треба да ја напушти својата позиција во италијанската модна куќа бидејќи сопственикот „Керинг“ планира да направи пресврт во ситуацијата со некогашниот успешен луксузен бренд. Овој стратегиски маневар е резултат на слабеењето на деловните резултати.
„Керинг“ објави дека Бицари, кој го води „Гучи“ од 2015 година, ќе ја напушти компанијата на 23 септември. Жан-Франсоа Палус, актуелниот извршен директор на групацијата, ќе го води брендот во текот на преодниот период.
Акциите на „Керинг“ рано во средата на париската берза скокнаа дури за 6,8 отсто.
Бицари заминува откако растот во „Гучи“, кој сочинува околу две третини од профитот на „Керинг“, заостана зад ривалите во последниве години. Претходниот креативен директор Алесандро Микеле ја напушти функцијата во ноември и на негово место дојде Сабат де Сарна, кој ќе ја претстави својата прва колекција за брендот во септември.
„Керинг“ започнува со трансформација на италијанскиот луксузен бренд
Qilai Shen/Bloomberg
Палус, кого извршниот директор на „Керинг“, Франсоа-Анри Пино, во изјавата го опиша како своја десна рака, ќе се фокусира на зајакнување на тимовите и операциите на „Гучи“ за да го врати ефектот на брендот. Палус ќе ја напушти функцијата во надзорниот одбор на „Керинг“ со седиште во Париз и ќе се стационира во Милано.
Промените во менаџментот „не се некоја голема експлозија, туку логична еволуција“, вели аналитичарот на „Ситигруп“, Томас Шове. Потезите ќе го подобрат одлучувањето и ќе покажат одлучност да се трансформира „Гучи“, додаде тој.
Акциите на „Керинг“ заостанаа со растот за повеќе од 25 проценти оваа година од ЛВМХ (LVMH - Moët Hennessy Louis Vuitton) и „Хермес“ (Hermès International). Пино рече дека реструктурирањето е насочено кон целосно искористување на растот на глобалниот пазар на луксуз, што му помогна на ЛВМХ да стане највредната компанија во Европа.
Под раното водство на Бицари и Микеле, приходите на „Гучи“ се зголемија повеќе од двојно меѓу 2015 и 2019 година, а популарноста на брендот на Инстаграм, омилената социјална мрежа на љубителите на модата, исто така цветаше. Сепак, пандемијата им стави крај на годините на брз раст на италијанскиот бренд.
.webp){kind=icon}