.webp){kind=icon}
Компанијата „Амазон“ (Amazon.com Inc.) ќе преземе мерки за оние работници во САД што ги игнорирале упатствата за враќање во канцеларија, а ова е најновиот во низата примери на компании што се обидуваат да го намалат времето во кое вработените работат од далечина.
Некои од вработените во „Амазон“ во САД минатата недела добиле електронска пошта во која се наведувало дека не ги исполнуваат очекувањата на компанијата да поминуваат најмалку три дена неделно во канцеларија, според копија од пораката до која „Блумберг“ имал увид. „Фајненшл тајмс“ претходно исто така објави за таквата порака.
„Амазон“ не е единствениот работодавец што ги затегнува правилата во однос на работата од далечина. Арвинд Кришна од „Интернешнл бизнис машинс“ (International Business Machines Corp.) рече дека од мај ќе биде потешко да бидат унапредени оние што не се во канцеларија.
Bloomberg
На почетокот на минатата недела, „Зум“ (Zoom Video Communications Inc), чиј софтвер за видеоконференции го олесни преминувањето на работа од далечина за време на пандемијата, соопшти дека вработените што живеат во близината на канцелариите мора да се појавуваат на работа барем два дена во неделата. И други компании, од „Чиптоле“ (Chipotle Mexican Grill Inc.) до „Блекрок“ (BlackRock Inc.), исто така го зголемија бројот на деновите за лично присуство.
Прочитајте повеќе: „Зум“ ги повика вработените на работа во канцеларија
И покрај крајот на заклучувањата од ерата на пандемијата, многу вработени не сакаат да се вратат во канцеларија со полно работно време. Посетеноста на канцелариите се стабилизира на 30 отсто под нормите пред пандемијата, според извештајот на глобалниот институт „Мекинзи“ (McKinsey), од минатиот месец.
Портпаролот на „Амазон“ одби да коментира за новите практики.
