„Ново Нордиск“ купува и нова компанија за пробив со лековите за слабеење

„Ново Нордиск А/С“ (Novo Nordisk A/S) ќе ја купи „Ембарк биотек“ (Embark Biotech), данска компанија што работи на лекови за намалување на апетитот, за 471 милион евра (512 милиони долари), во обид да ја задржи предноста во полето каде што забележа најголем раст - слабеењето.

Акционерите на компанијата „Ембарк биотек“ ќе добијат 15 милиони евра однапред и можат да добијат дури 456 милиони евра во потенцијални плаќања доколку производот напредува низ клиничките испитувања и се пласира на пазарот, се наведува во соопштението на „Ново Нордиск“.  Најавата вклучува и тригодишен договор за соработка во истражување и развој.

„Ново“ помогна да се зајакне данската економија бидејќи неговите лекови буквално донесоа револуција на пазарот кога станува збор за лековите против дебелина.

Студија што беше објавена минатата недела покажа дека „вегови“, најновиот и најпродаван лек за слабеење на „Ново“, ги ублажува симптомите на срцева слабост кај пациентите со дебелина.

Инаку „Ембарк“ е формиран во 2017 година, кога беше одвоен од Универзитетот во Копенхаген. Тројца научници открија нова цел што го намалува апетитот и ги зголемува потрошувачката на енергија и чувствителноста на инсулинот, хормонот што регулира како телото го трансформира шеќерот во енергија.

Поради одлуката, цените на акциите на „Ново“ имаа мала корекција во тргувањето во Копенхаген.