„Рајанер“ (Ryanair Holdings) ќе исплати дивиденда од 400 милиони евра и планира да им даде околу четвртина од годишниот профит на акционерите. Најголемата европска нискобуџетна авиокомпанија ги чувствува придобивките од зголемувањето на авиосообраќајот.
Авиокомпанијата објави добивка од 2,18 милијарди евра во првата фискална половина и во понеделникот објави дека годишната добивка ќе биде помеѓу 1,85 и 2,05 милијарди евра. Од „Рајанер“ исто така посочија дека можеби во иднина ќе исплатат специјални дивиденди и ќе започнат откуп на акции.
Нискобуџетната авиокомпанија предупреди дека значително повисоките трошоци за керозин и доцнењето на испораките на авионите од „Боинг“ (Boeing) имаат негативно влијание врз нејзиниот бизнис. Дополнителните трошоци за керозин значат дека „Рајанер“ „најверојатно“ нема да ги повтори резултатите што ги имаше во фискалниот трет квартал минатата година, соопшти компанијата. Оттаму наведоа и дека е тешко да се предвиди каков ќе биде традиционално слабиот четврти квартал.
Испораката на дури десет од 57 авиони „боинг 737 макс“ што се очекува до летото 2024 година може да биде одложена до зимата следната година, соопшти „Рајанер“. Авиокомпанијата е фрустрирана од доцнењето на испораката бидејќи тоа ја принуди да го промени зимскиот распоред.
„Најлошото сценарио е дека на крајот следното лето ќе пораснеме за 47 наместо за 57 авиони“, рече во интервју главниот финансиски директор Нил Сорахан.
„Рајанер“ очекува капацитетот да остане ограничен, делумно поради консолидацијата на авиокомпаниите низ Европа и делумно поради одржувањето на најновата генерација мотори „прат и витни “ (Pratt & Whitney), поради што во наредните две години ќе бидат приземјени повеќе авиони со тесно тело. Овие фактори ќе помогнат да се зголеми конкурентската предност на авиокомпанијата, која предвидува раст на патниците до 300 милиони до средината на следната деценија.
Вкупните оперативни трошоци се зголемија за 24 отсто, на 6,16 милијарди евра, што„Рајанер“ им го припишува на повисоките сметки за гориво, кои скокнаа за 29 отсто, на 2,8 милијарди евра. Иако авиокомпанијата обезбеди 85 отсто од своето гориво за околу 89 долари за барел за оваа фискална година, соопшти дека цената на горивото за која не успеала однапред да преговара е значително повисока.
Сорахан истакна дека втората половина од годината е традиционално помалку профитабилна бидејќи помалку луѓе одат на одмор во зимските месеци. И покрај тоа, тој рече дека има многу божиќни резервации.
„Ни претстои многу добра година, над очекувањата на нивото на цела година“, заклучи тој.
.webp){kind=icon}
