.webp){kind=icon}
„Просечната цена на лет во Америка се одржува на ниво од 110 долари, а кај 'Рајанер' (Ryanair) e 44 евра. Понатаму, сè уште е попристапно да се лета во Европа, но нема сомнеж дека цените не летовите растат, особено како што се приближуваме кон летото“, изјави извршниот директор на „Рајанер“, Мајкл О'Лери, во телевизиското интервју за „Блумберг“.
Тој вели дека постојано се зборува за кризи. Конкретно, цела зима се слушаа приказните за енергетската криза, растот на каматите итн., но тој истакнува дека позитивната работа се високата вработеност и тоа што луѓето на крајот од секој месец добиваат плата и трошат пари.
„Луѓето сакаат да трошат пари на патувања“, истакна Лери, додавајќи дека моментално во Европа е тешко да се добие маса во ресторан, хотелска соба или да се пронајде авиобилет.
Лери ги коментираше и цените на авионските билети, а предвидува дека по минатогодишниот раст од 14-15 проценти, авиобилетите и ова лето ќе бидат поскапи за околу 10 отсто. Тој очекува дека компанијата ќе опслужи 185 милиони патници, но таа бројка сепак би била од пет до десет проценти пониска отколку пред пандемијата. Прецизните бројки ќе бидат познати кога „Рајанер“ ќе ги објави официјалните финансиски резултати до крајот на мај.
Кога станува збор за предизвиците, Лери особено ги истакна проблемите со авиоконтролата, опишувајќи ја како да е во општ хаос. Тој особено се осврна на Франција, каде што контролорите на летање сега веќе штрајкуваат по два-три пати неделно. За тој проблем побарале помош лично и од претседателката на Европската комисија, Урсула фон дер Лајен, и ја замолиле да преземе нешто во врска со прашањето на прелети над Франција, бидејќи, како што наведува, штрајковите не влијаат само на домашните летови во Франција туку и на прелетите над француското небо.
Кога станува збор за среднорочни предизвици, извршниот директор на „Рајанер“ го истакна капацитетот на летовите, каде што најголемиот предизвик, според него, лежи кај производителите „Боинг“ (Boeing) и „Ербас“ (Airbus) и нивната способност да ги следат потребите на авиоиндустријата.
