Италија продаде околу 25 проценти од банката „Монте Паски“ (Banca Monte dei Paschi di Siena SpA) за приближно 920 милиони евра. Италија продаде 314,9 милиони акции за 2,92 евра по акција, соопшти Министерството за финансии. Акциите на „Монте Паски“ се затворија претходно на 3,07 евра во Милано. Пакетот акции што првично беше понуден на продажба изнесуваше 20 проценти од сопственоста, но понудата е зголемена поради големата побарувачка, се вели во соопштението.
Италија го започна процесот на продажба на „Монте Паски“ минатиот месец со ангажирање советници бидејќи премиерот Џорџија Мелони се обидува да ја максимизира вредноста на контролниот удел на државата. Продажбата може да се врши во една или повеќе фази, преку јавна понуда, преку вонредни операции или комбинирано, соопшти тогаш Министерството за финансии.
Рим долго време се мачеше да го продаде својот удел од 64 проценти во банката. Пред две години претходната Влада се обиде и не успеа да ја спои „Монте Паски“ со „Уникредит“ (UniCredit SpA). Но, напредокот постигнат под раководството на главниот извршен директор Луиџи Ловаљо, кој направи пресврт по долгогодишно реструктуирање ја направи „Монте Паски“ попривлечна за инвеститорите.
На Италија и беше дозволено да ја национализира „Монте Паски“ во 2017 година под услов да биде реприватизирана до 2021 година, рок кој подоцна беше продолжен до 2024 година.
Владата настојува да ја спои „Монте Паски“ со банка која има слична големина за да создаде нов центар кој ќе го задржи најстариот банкарски бренд во светот, објави Блумберг во септември. Продажбата на малцински удел пред таков договор ќе и купи време на Мелони и ќе покаже дека е посветена на почитување на правилата на ЕУ. Тоа, исто така, би го направило преостанатиот удел поевтин за кој било потенцијален партнер, велат луѓето со познавање на ова прашање.
Основана во 1472 година, „Монте Паски“ претрпе долгогодишни мачни напори да го одржи во живот својот бизнис. Банката за прв пат беше спасена во 2009 година, откако беше погодена од лоши зделки за заеми. Во следната деценија, таа се бореше да испорача постојан профит, со оглед на ограничениот простор за маневрирање поради условите што Европската унија ги постави за национализацијата на банката.
.webp){kind=icon}
