.webp){kind=icon}
„Најки“ (Nike) ќе ја намали својата глобална работна сила за околу два отсто, како дел од мерката за намалување на трошоците за да се спротивстави на послабите изгледи за продажба и на растечката конкуренција.
Компанијата со седиште во Орегон не го потврди бројот на работници што ќе бидат погодени, иако моментално има околу 83.700 вработени низ светот.
„Активностите што ги преземаме нè ставија во позиција да ја приспособиме нашата организација за да ги искористиме нашите најголеми можности за раст, бидејќи интересот за спорт, здравје и благосостојба никогаш не бил посилен“, се наведува во соопштението на „Најки“.
Укинувањето на работните места следува по најавата во декември дека компанијата се стреми кон заштеда од дури 2 милијарди долари, вклучувајќи и намалување на работната сила и поедноставување на асортиманот на производи, бидејќи зголемената претпазливост на потрошувачите влијае на продажбата.
Тоа доведе до пад на акциите на „Најки“, кои се борат да закрепнат и останаа во пад од околу два отсто годинава.
Укинувањето на работните места ќе се одвива во две фази, се наведува во меморандумот на „Најки“ во кој „Блумберг“ имал увид. Првата фаза започнува в петок и ќе трае во текот на следната недела, додека втората рунда ќе биде комплетирана до крајот на четвртиот квартал.
