.webp){kind=icon}
„Фич рејтингс“ го потврди долгорочниот кредитен рејтинг на подружниците на „ПроКредит Холдинг“ во Македонија и Косово со стабилен изглед. Рејтингот на „ПроКредит банка“ АД Скопје е задржан на „БББ-“ додека на косовската „ПроКредит банка“ во Приштина е задржан на 'ББ+'.
Од „Фич“ објаснуваат дека работното опкружување во Македонија се карактеризира со нејзината мала економија, обележана со одредена нестабилност во растот на реалниот БДП.
„Стабилноста на локалната валута се одржува преку долгогодишното врзување на девизниот курс со еврото. „Фич“ предвидува дека економскиот раст ќе зајакне на 2,9 проценти во 2024 година, при што приватната потрошувачка ќе продолжи да биде примарен двигател. Додека банкарскиот сектор се очекува да одржи силни перформанси, профитабилноста може малку да се намали поради очекуваните намалувања на каматните стапки подоцна оваа година“, соопшти „Фич“.
„Фич“ додава дека коефициентот на оштетените заеми на македонската подружница на „ПроКредит“ (два проценти на крајот на 2023 година) е на позитивно ниво споредливо со останатите банки во земјата и другите подружници на матичната компанија. „Фич“ предвидува дека овој коефициент ќе остане под 2,5 проценти до крајот на 2025 година, благодарение на претпазливите практики на банката за преземање на обврските и нејзината умерена изложеност на ранливите сектори.
