„Стелантис“ ја покажа „фиат гранде панда“ што ќе се произведува во Србија

„Стелантис“ (Stellantis) откри како ќе изгледа „фиат гранде панда“, која треба да се произведува во Крагуевац, а новиот електричен автомобил ќе биде претставен пред јавноста на 11 јули, кога „Фиат“ слави годишнина.

Овој автомобил е дизајниран во Торино по примерот на „пандата“ од осумдесеттите години на 20 век и се базира на мултиенергетска платформа, што значи дека ќе има електрична и хибридна варијанта.

„Стелантис“ објави дека „гранде панда“ (grande panda) е прва во серијата нови модели што ќе се лансираат секоја година до 2027-та. Овие возила ќе бидат изградени на мултиенергетска паметна платформа за автомобили.

Оливие Франсоа, извршен директор на „Фиат“ (Fiat), рече дека тоа е најдобриот начин да се прослават 125 години од постоењето на италијанската компанија.

Stellantis

„’Фиат гранде панда’ е дизајнирана во Торино и се базира на глобална платформа, која му дава можност на брендот да достигне глобална експанзија“, рече Франсоа. Автомобилот прво ќе се нуди во Европа, Блискиот Исток и во Африка и ќе биде достапен и во електрични и во хибридни модели.

Електричната верзија би требало да има 113 КС, батерии од 44 kWh и досег до 320 километри, додека хибридната верзија ќе комбинира 1,2-литарски трицилиндричен бензински мотор и електромотор.

Новиот модел на автомобил е долг околу четири метри и може да превезува пет лица.

Иако во соопштението не е експлицитно наведено дека овој автомобил ќе се произведува во Крагуевац, за време на минатогодишната посета на италијанската премиерка Џорџа Мелони на Белград веќе беше најавено дека електричната „панда“ ќе се произведува во Србија. Покрај тоа, неодамна беа најавени уште два модела за Италија.

Stellantis

Работниците од фабриката во која до пред две години се произведуваше „фиат 500 Л“ напорно работат на подготовка на сериското производство на новиот модел. Официјалното претставување на тој модел беше најавено за годишнината на компанијата, а почетокот на производството во последниот квартал од годинава.

Производителот ФЦА (FCA) инвестира 162 милиони евра во производство на нов модел на автомобил. Компанијата е во мнозинска сопственост на „Стелантис“, која таму поседува 66 отсто од акциите, додека Владата на Србија е малцински партнер. Државата го субвенционира производството со 48 милиони евра, а првата транша во износ од 15,5 милиони евра беше исплатена во декември минатата година.

Во моментов нема коментари за веста. Биди прв да коментира...

Остави коментар