Српскиот претседател Александар Вучиќ потврди дека во Крагуевац ќе се произведува електричниот автомобил „фиат панда“, говорејќи во неделата по средбата со италијанската премиерка Џорџа Мелони, која беше во официјална посета на Србија. Тој рече дека ова производство ќе биде силен поттик на трговската размена меѓу Италија и Србија, која во моментов достигнува вредност од 4,6 милијарди евра годишно.
Српската редакција на „Блумберг Адрија“ веќе пишуваше дека компанијата „Стелантис“ до крајот на следната година треба да почне да произведува електрични автомобили откако јави за неколку десетици нови вработувања што се ангажирани на работа со роботите.
Сепак никој, па ни претседателот Вучиќ, не наведува кога точно би требало да почне производството.
Тековната генерација на „панда“ се произведува во фабриката на „Фиат“ во близината на Неапол.
Италијанските и француските медиуми веќе објавија дека електричната „панда“ ќе се произведува во Србија на платформата на „ситроен Ц3“.
„Во фабриката во Крагуевац пристигна опрема и се ангажирани околу 500 работници што работеа во „Фиат“ на производство на стариот модел ’500 Л’“, изјави пред неколку дена Саша Ѓорѓевиќ, претседател на синдикатот ФЦА (FCA).
Тој нагласи дека за електричен автомобил се потребни значително помалку работници. Во оваа фабрика би требало да работат околу 1.500 луѓе, што е речиси половина од бројот на ангажирани кога таму „Фиат“ ги правеше „фиат 500 Л“.
Тоа е до одреден степен очекувано бидејќи процесот на производство на електрични автомобили е во голема мера автоматизиран, но бара поголеми инвестиции.
Според договорот што на крајот на април 2022 година го потпишаа тогашната министерка за економија Анѓелка Атаначковиќ и Силвија Вернети, директорка на ФЦА Србија, оваа компанија ќе инвестира 162 милиона евра во производство на нов модел на автомобил. ФЦА е во мнозинска сопственост на „Стелантис“ со 66 отсто од акциите, додека малцински партнер е Владата на Србија.
Уредништвото во Белград пишуваше и дека државата ќе го субвенционира производството на електрични автомобили со 48 милиони евра. Но корисникот на субвенцијата треба од свои пари да инвестира најмалку 25 отсто во нов иновативен електричен автомобил, кој не содржи никаква државна поддршка.
Според тој договор, предвидено е државната помош да се исплати на две рати, 15,5 милиони евра во 2023 година и 32,54 милиони евра во 2024 година.
.webp){kind=icon}