„Тесла“ ги надмина ниските процени за продажба на возила

Вториот последователен пад на кварталните испораки на „Тесла“ (Tesla Inc.) не беше толку груб како што предвидуваа аналитичарите, поради што акциите на производителот за електрични возила пораснаа дури за 10 проценти.

Производителот на автомобили во вторникот соопшти дека испорачал 443.956 возила во вториот квартал, надминувајќи ја просечната процена на Волстрит од 439.302. Додека продажбата е намалена за 4,8 отсто од пред една година, „Тесла“ постигна напредок во однос на 386.810 испорачани возила во првите три месеци од годинава.

Во текот на кварталот компанијата произвела 410.831 возило, што е за 14 отсто помалку во однос на истиот период пред една година. „Тесла“ не понуди објаснување за падот на продажбата и производството, но повеќе детали ќе даде кога ќе ја објави заработката на 23 јули.

„Ние сме охрабрени од силните испораки и го гледаме ова како позитивно за поширокото расположение на пазарот на електрични возила“, напиша во белешка Бен Кало, висок аналитичар во „Роберт В. Берд“ (Robert W. Baird).

„Тесла“ објави последователен пад на испораките Bloomberg

„Тесла“ имаше бурна година. Извршниот директор Илон Маск најави значителни намалувања на персоналот во април и изврши внатрешен притисок да се намали бројот на вработени дури за 20 проценти. Отпуштањата вклучуваа и вработени во продажбата, што можеби имаше влијание врз послабите резултати од испораката. Првиот нов модел на производителот на ЕВ по повеќе години, „сајбертрак“, исто така бавно напредува.

„Тесла“ го обвини подметнувањето пожар во фабриката во близината на Берлин, како и пренасочувањето на бродовите од Црвено Море на други маршрути, за млакиот прв квартал. Иако имаше помалку надворешни нарушувања на бизнисот во текот на изминатите три месеци, компанијата се бореше да расте со линија на возила што веќе старее.

Маск нареди намалување на цените на линијата на „Тесла“ во изминатата година и половина, но тие мерки не направија доволно за да го одржат замавот. Производителот на автомобили од Остин испорача 422.405 од своите најпродавани модели „модел 3“ (Model 3) и „модел уај“ (Model Y) во вториот квартал, што е помалку од 446.915 пред една година.

Компанијата сè уште не објавила податоци за продажбата на „сајбертрак“, пикапот што почна да го испорачува на крајот на минатата година. Двете кампањи за повлекување во јуни сугерираат дека „Тесла“ повлече повеќе од 11.000 единици од моделот. За време на годишниот состанок на акционерите на компанијата минатиот месец, Маск рече дека производителот на автомобили произвел 1.300 пикап-камиони за една недела, иако не прецизира кога и не разговараше дали „Тесла“ ќе го задржи тоа темпо.

Повеќе детали прочитајте на следниот ЛИНК.

Во моментов нема коментари за веста. Биди прв да коментира...

Остави коментар