Вредноста на „Енвидија“ падна за 900 милијарди долари

На прв поглед распродажбата на „Енвидија“ (Nvidia Corp.) од 900 милијарди долари од нејзиниот рекорд во јуни укажува дека бумот на трошоците за вештачка интелигенција се лади. Но подземните струи раскажуваат помалку страшна приказна.

„Мајкрософт“ (Microsoft Corp.), „Амазон“ (Amazon.com Inc.), „Алфабет“ (Alphabet Inc.) и „Мета“ (Meta Platforms Inc.) - заедно сочинуваат повеќе од 40 отсто од приходите на „Енвидија“ - рекоа дека ќе продолжат да инвестираат милијарди во инфраструктурата за вештачка интелигенција. Во меѓувреме, СМЦ (Super Micro Computer Inc.) - која произведува сервери за центри за податоци што се користат во вештачката интелигенција - им кажа на инвеститорите дека очекува да генерира до 30 милијарди долари од продажбата во текот на следната година, со што ги распрсна очекувањата на аналитичарите. А сепак, „Енвидија“ - која има најголема бенефиција од трошоците за вештачка интелигенција - забележа пад на нејзините акции за 25 отсто за помалку од два месеца.

„Никој не ги намали бројките и не рече дека работите со вештачката интелигенција не функционираат или дека правиме пауза со вештачката интелигенција“, рече Рис Вилијамс, главен стратег во „Вејв капитал“ (Wayve Capital Management LLC). „Едноставно луѓето се многу нервозни“.

Инвеститорите веќе со недели ретерираат од скапите технолошки акции и, наместо тоа, купуваат сè, од акции со мала капитализација до комунални услуги и компании за недвижности. Минатонеделните податоци за работните места, кои беа послаби од очекуваното, дополнително ги поттикнаа стравувањата дека американската економија може да забави побрзо од очекуваното. Извештајот од четвртокот, кој покажува пад на поднесоците за невработеност, помогна да се смират некои од грижите, што ги поттикна пазарите на акции да ги намалат неодамнешните загуби.

„Несигурноста во врска со макроекономската заднина може да додаде дополнителна нервоза и да тежи повеќе врз ’Енвидија’ и другите технолошки компании отколку кварталните приходи“, рече Вилијамс. 

Во исто време технолошките компании во голема мера не успеаја да ги убедат инвеститорите за време на извештаите за заработка дека нивните трошоци за вештачка интелигенција се претвораат во поголема продажба и поголем профит. „Сè уште не сме виделе начин за монетизација од вештачката интелигенција, така што повратот од тоа трошење е нејасен. Прашањето е колку долго може да продолжи тоа“, рече Срини Паџури, управен директор и виш истражувачки аналитичар во „Рејмонд Џејмс“ (Raymond James).

Недостигот од катализатори пред извештајот за заработката на „Енвидија“ на крајот на август значи дека наративот за производителите на чипови за вештачка интелигенција веројатно нема да се промени во следните недели, според Паџури. „Тоа ќе биде предизвик за овие акции да функционираат во моментов“, рече тој.

„Енвидија“ исто така се соочи со други неодамнешни предизвици. Компанијата наиде на инженерски проблеми во развојот на два нови напредни чипа, објави „Блумберг“ (Bloomberg) неделава, додека некои инвеститори се исто така загрижени за потенцијалот на поголемата конкуренција. Многу од најголемите клиенти на „Енвидија“, вклучувајќи ги и „Алфабет“ и „Мајкрософт“, развиваат сопствени чипови што ќе ги користат за развој на вештачка интелигенција. Иако може да бидат потребни години за тие производи да бидат готови, тие би можеле да заземат удел на пазарот.

„Енвидија“ не е единственото име поврзано со вештачката интелигенција што е погодено од широкораспространетото намалување. Индексот Philadelphia Semiconductor падна за повеќе од 20 отсто од јулскиот врв. И покрај силната перспектива на СМЦ (Super Micro Computer), нејзините акции паднаа за 20 отсто во средата, откако инвеститорите беа разочарани од нејзината бруто-маржа.

Секако, акциите на „Енвидија“ се удвоија во вредност годинава, дури и по неодамнешниот пад. Сè уште има знаци на солидна побарувачка за чипови за вештачка интелигенција во блиска иднина, а Волстрит во голема мера е оптимистичен за технологијата. Акциите на АМД (Advanced Micro Devices Inc.) се зголемија кога објави заработка кон крајот на јули, што вклучуваше оптимистичка прогноза за приходите, наведувајќи ја зголемената побарувачка за акцелератори на вештачка интелигенција.

И можеби беше само прашање на време кога сјајот на „Енвидија“ ќе се намали.

„Ништо фундаментално не се промени со овие компании освен што тие веројатно отидоа малку пред себе“, рече Кен Махони, претседател и извршен директор на „Махони асет“ (Mahoney Asset Management).

Во моментов нема коментари за веста. Биди прв да коментира...

Остави коментар