„Леново“ (Lenovo Group Ltd.) објави подобра од очекуваната квартална добивка, зголемувајќи ги надежите за постепено закрепнување во компјутерската индустрија, поттикната од глобалните трошоци за вештачка интелигенција (ВИ).
Нето-приходот се зголеми за 38 отсто, на 243 милиони долари, во трите месеци заклучно со јуни, посочија од „Леново“ во поднесок во четвртокот; што се споредува со просечната процена на аналитичарите од 231 милион долари. Приходите се зголемија за 20 отсто, на 15,4 милијарди долари.
Овие резултати ја одразуваат зголемената побарувачка, бидејќи серверите - клучни за развојот на вештачката интелигенција - го подигнаа пазарот на компјутерски хардвер по неговиот пад по ковид. Од „Амазон“ (Amazon) до „Гугл“ (Google) и „Баиду“ (Baidu Inc), големите технолошки компании брзо ги зголемуваат трошоците за центрите за податоци, подготвувајќи се за предвидениот бум на услугите за вештачка интелигенција.
„Леново“ сега има поголема предност пред ХП (HP Inc.) и „Дел“ (Dell Technologies Inc), со испорачани 14,7 милиони единици во текот на јунскиот квартал, според истражувачката компанија ИДЦ (IDC). Сепак, акциите на кинеската компанија заостанаа зад своите ривали годинава, делумно поради загриженоста за втората по големина економија во светот и изложеноста на геополитички тензии.
Извршниот директор Јанг Јуанкинг се обложува на уреди со вештачка интелигенција за да го зајакне глобалниот бизнис на „Леново“ во наредните години, иако пазарот останува непроверен.
„Побарувачката за компјутери поврзани со вештачка интелигенција можеби нема да се појави до 2025 година, а сè уште постои прашање за одржливоста на тој пазар“, напишаа аналитичарите на „Блумберг интелиџенс“ (Bloomberg Intelligence), Сесилија Чан и Стивен Ценг.
Геополитичките ризици, вклучувајќи ги потенцијалните нови тарифи за компјутери или ограничувањата за извоз на чипови од американски или европски регулатори, остануваат под знак прашалник за 40-годишното „Леново“.
Администрацијата на Бајден веќе воведе голем број ограничувања за извозот на напредни технологии и процесори за производство на чипови во Кина, вклучувајќи ги и врвните чипови за обука за вештачка интелигенција на „Енвидија“. „Леново“, инаку, е убедливо најголем продавач на сервери во земјата.
.webp){kind=icon}