„Убер“ доби казна од рекордни 290 милиони евра

Компанијата „Убер“ (Uber Technologies Inc.) доби казна од рекордни 290 милиони евра (324 милиони долари) од холандското тело за заштита на приватноста затоа што не ги почитувала европските стандарди за заштита кога испратила делови од чувствителните податоци за своите возачи во САД. Холандската управа за заштита на податоците соопшти дека „Убер“ собира информации за возачите од Европа, како што се лиценци за такси, податоци за локација, а во некои случаи и криминални и медицински податоци и ги задржува на серверите во САД.

Станува збор за највисока казна што некогаш била изречена од холандскиот надзорник против која било компанија, соопшти портпаролот преку мејл. Тоа е и најголемата казна што ја доби „Убер“ на глобално ниво. Компанијата која дава транспортни услуги ги испраќала чувствителните податоци до своето седиште во САД повеќе од две години без користење алатки за пренос на податоци насочени кон заштита на приватноста, што значело дека податоците биле „недоволно заштитени“, соопшти надзорното тело. „Убер“ прекинала со прекршување на регулативата минатата година.

Казната е „целосно неоправдана“, рече Каспар Никсон, портпарол на „Убер“ во одговорот на прашања испратени преку мејл. Процесот на пренос на податоци на „Убер“ беше во согласност со европските закони и компанијата ќе поднесе жалба против одлуката, рече Никсон.

„Убер“ не ги исполни барањата од европските закони за да „обезбеди ниво на заштита на податоците во однос на трансферите во САД. Тоа е многу сериозно“, рече Алеид Волфсен, претседател на холандскиот орган за заштита на податоци.

Холандската управа за заштита на податоци ја започна својата истрага за „Убер“ откако повеќе од 170 француски возачи се пожалија на француска група за човекови права. Со истрагата раководеше холандската агенција бидејќи европското седиште на „Убер“ е во Холандија.

Ова е трета казна од страна на холандскиот орган за заштита на податоците за „Убер“. Компанијата претходно беше казнета затоа што не обезбеди доволно транспарентност за тоа колку долго ги чуваше податоците од европските возачи и до кои земји надвор од Европа се проследени овие податоци. Во 2018 година беше казнета затоа што навреме не го информирала холандскиот надзорник за прекршување на податоците. Казните од европските чувари на приватност може да изнесуваат најмногу четири проценти од глобалниот годишен приход на еден бизнис.