.webp){kind=icon}
Грчкото јавно претпријатие за електрична енергија, фирма мајка на македонската компанија ЕДС („Енерџи деливери солушнс“) ќе се шири во Романија. Минатата недела вакво известување добила Комисијата за заштита на конкуренцијата.
Комисијата извести дека грчкото јавно претпријатие ќе стекне единствена контрола директно над друштвата: „Феликс рењувабл холдингс“, „ТМК хидроенерџи пауер“ и индиректна контрола над „Овидиу девелопмент“, „Томис тим“ и „М.В. тим инвест“, сите од Романија.
„Јавното претпријатие за електрична енергија, акционерско друштво, е водечки производител и снабдувач на електрична енергија во Грција. Јавното претпријатие за електрична енергија, акционерско друштво, е владејачко друштво на групацијата ППК“, се наведува во известувањето на комисијата. „Главните активности на групацијата ППК опфаќаат производство, дистрибуција и снабдување со електрична енергија во Грција и во Романија. Групацијата ППК е активна и во малопродажбата на електрични апарати и електроника“, пишува во известувањето на комисијата.
Во земјава ППК, директно, има регистрирано едно зависно друштво - друштвото за трговија и услуги „Енерџи деливери солушнс“, чија дејност е трговија со електрична енергија.
Романските фирми што ги презема ППК немаат регистрирано зависни друштва или подружници во Република Македонија.
„Врз основа на прелиминарното испитување, комисијата утврди дека предметната концентрација може да потпадне под одредбите на Законот за заштита на конкуренцијата. Сепак, конечната одлука по ова прашање е резервирана. Комисијата ги повикува заинтересираните трети страни да достават забелешки и мислења за оваа концентрација до комисијата“, се наведува во известувањето.
Рокот за доставување на забелешките и мислењата е 10 дена од денот на објавувањето на известувањето (30.8.2024 година).
