„Мајкрософт“ ја подигна дивидендата за 10 отсто и купува свои акции за 60 милијарди долари

„Мајкрософт“ (Microsoft) претстави нова програма за откуп на акции вредна 60 милијарди долари. Ова е истиот износ со кој технолошката компанија го постави својот рекорд за откуп пред неколку години, а дознавме и дека акционерите ќе добијат 10 отсто поголема квартална дивиденда.

Софтверската компанија соопшти дека акционерите ќе добиваат квартална дивиденда од 83 центи по акција почнувајќи од 21 ноември, во однос на сегашните 75 центи по акција. Договорот за откуп на акции, кој нема рок на траење, стапува во сила наместо програмата од 2021 година, која исто така беше вредна 60 милијарди долари.

„Мајкрософт“ е втора по големина компанија по пазарна капитализација, а побарувачката за софтвер за развој на вештачка интелигенција му донесе полза во последните неколку години. Оваа компанија ја вклучи технологијата за вештачка интелигенција на својот партнер „Опен еј-ај“ (OpenAI) во своите производи и оттогаш тие ги рекламираат напредните карактеристики на своите апликации, вклучувајќи ги Тимс (Teams), Ворд (Word) и Аутлук (Outlook). Во понеделникот „Мајкрософт“ исто така претстави нова линија на алатки за вештачка интелигенција.

Акциите поскапеа за помалку од еден процент во тргувањето по работното време, по објавувањето на откупот на акциите. Акциите минатата година поскапеа за 31 отсто.

„Мајкрософт“ имал 75,5 милијарди долари во готовина на 30 јуни, според податоците собрани од „Блумберг“. Слободниот готовински тек во четвртиот фискален квартал изнесуваше 23,3 милијарди долари, соопшти компанијата со седиште во Редмонд, Вашингтон. Ова е за 18 отсто повеќе од претходната година, што ѝ овозможува на компанијата да издвои повеќе за капитални инвестиции за технологии во облак и вештачка интелигенција, додаваат оттаму.