Договорот меѓу „Мајкрософт“ и „Опен еј-ај“ ќе избегне формална истрага од ЕУ

Инвестицијата на „Мајкрософт“ од 13 милијарди долари во „Опен еј-ај“ (OpenAI Inc.) веројатно ќе избегне формална истрага од надзорните тела на Европската Унија, што ги смири стравувањата дека врската меѓу двете компании може да се распадне.

Европската комисија одлучи дека врската не заслужува формална истрага бидејќи не може да се категоризира како преземање, односно „Мајкрософт“ не ја контролира насоката на „Опен еј-ај“, според извори запознаени со ова прашање.

Антимонополската група на ЕУ во јануари соопшти дека разгледува дали вмешаноста на „Мајкрософт“ во „Опен еј-ај“ треба да биде проверена откако превратот во раководството кај креаторот на ЧетГПТ (ChatGPT) откри длабоки врски меѓу двете фирми.

Иако повеќето договори испитани врз регулативата за спојување на ЕУ на крајот се одобрени од бриселските надзорни тела, сепак официјалните лица не се двоумат да го искористат правото на вето доколку какви било проблеми во однос на конкуренцијата не можат да се поправат во строго поставените рокови.

„Мајкрософт“ одби да коментира, освен што укажа на претходна изјава дека партнерството со „Опен еј-ај“ „поттикнува повеќе иновации и конкуренција во однос на вештачката интелигенција, додека ја зачувува независноста за двете компании“.

Bloomberg

Портпаролот на комисијата рече дека за да се испитаат потенцијални грижи за конкуренцијата, чуварот „прво треба да заклучи дека има промена на контролата на трајна основа“ меѓу двете фирми.

Во срцевината на партнерството помеѓу „Мајкрософт“ и „Опен еј-ај“ е огромното количество на компјутерска моќ потребна за да продолжи светскиот бум во развојот на генеративната вештачка интелигенција. Работењето на системите зад алатките како што се ЧетГПТ и Бард на „Гугл“ ја зголеми побарувачката за облак-услуги и капацитет за обработка. „Опен еј-ај“, на пример, стана главен клиент за облак-услугите на „Мајкрософт“.

Трите најголеми светски провајдери за облак-услуги - „Мајкрософт“, „Амазон“ (Amazon.com Inc.) и „Гугл“ на „Алфабет“ (Alphabet Inc.) - станаа активни инвеститори во стартапи за вештачка интелигенција во последните години. Компанијата за вештачка интелигенција „Антропик“ (Anthropic) привлече инвестиција од 4 милијарди долари од „Амазон“ и инвестиција од 2 милијарди долари од „Гугл“, кој исто така во 2021 година создаде партнерство со фирмата за вештачка интелигенција „Кохир“ (Cohere).

Во моментов нема коментари за веста. Биди прв да коментира...

Остави коментар