Сем Алтман во драматичен пресврт се враќа на чело на „Опен еј-ај“

Водечката компанија во сферата на вештачката интелигенција „Опен еј-ај“ (OpenAI) ќе го врати Сем Алтман и ќе назначи нови членови на одборот, откако речиси сите нејзини вработени се заканија дека ќе дадат отказ поради неговото ненадејно сменување.

Алтман се враќа на својата улога како извршен директор, а со новиот одбор ќе претседава Брет Тејлор и ќе ги вклучува Лери Самерс и Адам Д'Анџело, соопшти компанијата во објавата на платформата X. Во пораката се наведува дека во моментов работат на деталите.

Алтман, кој беше отпуштен од одборот на „Опен еј-ај“ во петокот, по несогласувањата за тоа колку брзо да се развива и заработува од вештачката интелигенција, преговараше со компанијата за враќање. Разговорите отидоа во ќор-сокак во неделата, делумно поради притисокот од Алтман и од другите вработени да поднесат оставки тековните членови на одборот, според луѓе запознаени со ова прашање. 

Наместо тоа, одборот именува нов лидер - поранешниот извршен директор на Твич (Twitch), Емет Шир, а најголемиот поддржувач на „Опен еј-ај“, „Мајкрософт“ (Microsoft Corp.), нагласи дека ќе го ангажира Алтман да води нов интерен тим за вештачка интелигенција.

Сепак, по очигледниот притисок од инвеститорите и од вработените, компанијата одлучи да го врати Алтман на неговата стара позиција.