БЈД го прекина партнерството со „Мерцедес“ во Кина

Кинескиот производител на автомобили БЈД (BYD) презеде целосна контрола врз заедничкото претпријатие што го имаше во Кина со групацијата „Мерцедес-Бенц“ (Mercedes-Benz), додека сè поголем број странски производители на автомобили ја намалуваат својата изложеност на најголемиот светски автомобилски пазар.

БЈД ги купи преостанатите 10 отсто од акциите што не ги поседуваше во компанијата, која беше основана за продажба на премиум брендот на електрични возила „Денза“ (Denza), се наведува во соопштението од понеделникот. Претставниците на „Мерцедес-Бенц“ во Кина одбија да коментираат.

Овој потег го завршува 13-годишното партнерство и доаѓа во време на зголемени трговски тензии меѓу Кина и Европа, додека Европската комисија работи на воведување дополнителни царини за кинеските електрични возила до 36,3 проценти. Гласањето на земјите членки за тој предлог е планирано за следната недела.

„Денза“, основана како „Шенжен БЈД њу енерџи“ (Shenzhen BYD New Energy), беше основана од БЈД и „Мерцедес“ во 2011 година, при што секој имаше по 50 проценти од акциите. Потфатот се фокусираше на премиум електричните возила, но слабата продажба доведе до тоа „Мерцедес“, тогаш познат како „Дајмлер“ (Daimler), да го намали својот удел на 10 проценти во 2021 година.

Откако ја ресетира својата стратегија следната година, „Денза“ наиде на нова популарност со своите луксузни патнички комбиња, односно нејзиниот миниван Д9 (D9), рангиран како најпродаван во категоријата за 2023 година. Според извештаите на локалните медиуми, „Денза“ треба да го лансира својот модел З9ГТ (Z9GT) во текот на неделава, со претпродажба по цена што започнува од 339.800 јуани (47.900 долари).