.webp){kind=icon}
Циклонот Борис неодамна ја зафати Централна Европа и предизвика големи проблеми во Австрија, Чешка, Полска и Романија, како и во Унгарија. Многумина велат дека ова се најтешките поплави во оваа деценија, кои ќе предизвикаат милијарди штети на економијата. Според последните извештаи, загинале и повеќе од 20 лица.
Обилните дождови деновиве предизвикаа сериозни проблеми во Европа, многу реки на повеќе места се излеаја од коритата. Досегашните процени за штетите се движат од неколку стотици милиони евра до повеќе од една милијарда евра, покажуваат податоците што ги сумираше „Ројтерс“ според наодите на рејтинг-агенцијата „Морнингстар ДБРС“.
Во Европа поплавите веќе се најскапата природна опасност, според британскиот еколошки консултант „ЏБА риск менаџмент“ (JBA Risk Management). Излевањето на реките чини 7,8 милијарди евра секоја година, а овие трошоци се очекува да се зголемат бидејќи економиите во областите со висок ризик од поплави продолжуваат да растат, а климатските промени предизвикуваат поинтензивни врнежи.
Прочитај повеќе
Расте бројот на жртви од поплавите во Европа
Црвениот аларм сè уште е во сила за делови од Австрија, Чешка, Унгарија и јужна Германија.
16.09.2024
Патнички хаос се шири во Централна Европа по големите поплави
Поројниот дожд предизвика поплави низ големи делови од централна и источна Европа
15.09.2024
Во Полска предупредувањата на метеоролозите и хидролозите беа сфатени исклучително сериозно. Градоначалникот на Ниса, Кордијан Колбијарц, ги советуваше жителите (околу 44.000) да се засолнат со своите најмили и најпотребни работи во повисоките области. Дури и во историски познатиот град Вроцлав, жителите на одредени области беа советувани да се евакуираат.
Во Унгарија внимателно се следи нивото на водата на реката Дунав, а премиерот Виктор Орбан ги откажа меѓународните патувања поради „екстремните временски услови и поплавите во Унгарија“, јавува Би-би-си.
Во Чешка само за неколку дена во Јесеник наврнале пет пати повеќе врнежи од очекуваното месечно количество. Во австрискиот град Св. Полтен имало повеќе врнежи за четири дена отколку во рекордната година по врнежи, 1950 година.
Што се случува со полската осигурителна компанија ПЗУ?
Акциите на полската осигурителна компанија ПЗУ изгубија повеќе од седум отсто од вредноста за време на тргувањето во понеделникот, но во вторникот се вратија и го завршија денот на варшавската берза со шест отсто над почетната точка. Како што пренесува „Блумберг“, осигурителната компанија сè уште нема објавено процена за влијанието на поплавите врз нејзиниот бизнис.
Полската, романската и австриската влада ослободија стотици милиони евра вонредни фондови, додека чешката влада размислува да го промени буџетот за 2024 година поради штетите предизвикани од годинашните поплави, пренесува „Евроњуз“.
Какво е влијанието врз бизнисот на осигурителните компании?
Последиците од поплавите ќе се одразат и во извештаите на осигурителните компании.
Во продолжение прочитајте што вели аналитичарот на „Блумберг Адрија“, Матео Мошња, за работењето на осигурителните компании „Алијанц“ и „Џенерали“.
Во првата половина од годинава за 17 отсто собрале повеќе премии за осигурување од пожар и елементарни непогоди.
Минатата година сегментот на неживотно осигурување, односно осигурување имот и несреќи, ѝ донесе зголемување на оперативната добивка од 1,2 отсто на осигурителната компанија „Алијанц“, додека приходите беа зголемени за 11,2 отсто.
„Ова е показател за пониски маржи, што се одразува и на 0,6 процентни поени повисоки комбинирани коефициенти во споредба со минатата година“, вели тој. Мошња објаснува дека тоа делумно се должи на инфлацијата, а делумно на ефектот на природните катастрофи, кои го чинеа „Алијанц“ 2,3 милијарди евра или 30 отсто повеќе од претходната година.
Годинава се гледа дека мартовските поплави во јужна Германија негативно се одразиле во вториот квартал, во износ од 642 милиони евра. Затоа е за очекување дека сегашните поплави, кои овој пат најмногу ја зафатија Централна Европа, ќе имаат уште поголем ефект на нивото на целата година во однос на лани, посочи тој.
И за другата европска осигурителна компанија „Џенерали“ сликата е слична.
Минатогодишното работење беше негативно погодено од природни катастрофи, кои ја чинеа 1,1 милијарда евра или 70 отсто повеќе во споредба со претходната година. Годинава, според аналитичарите, приказната се повторува: „Во вториот квартал, поради поплавите во Германија и во Австрија, може да се види 40 отсто зголемување на негативното влијание на природните катастрофи (250 милиони во однос на 178 милиони евра).
Ја истакнуваме и компанијата „Цирих иншуренс груп“ (Zurich Insurance Group), која постигна повисок комбиниран коефициент во првата половина од 2024 година, наведувајќи ги природните катастрофи како главна причина за поголемото учество на трошоците во приходите, кое се зголеми од 1,8 отсто од премијата во првата половина од 2023 година на 2,4 отсто во првата половина од 2024 година.
