Кулминација на битката за „Македонијатурист“: На аукција ќе се понудат 44.449 акции од компанијата

Македонската берза денеска информира дека на 27.11.2024 година (среда), на барање на членката „Еурохаус“ АД Скопје, по пат на јавна берзанска аукција на акции при продажба на големи пакети на акции ќе се понуди за продажба пакет од 44.449 обични акции издадени од „Македонијатурист“ АД Скопје што претставува 9,83 проценти од основната главнина на друштвото. Акциите ќе се продаваат со почетна цена од 10.150 денари по акција преку моделот “се или ништо“.

„Блумберг Адрија“ веќе објави дека минатата недела донесе нови промени во сопственичката структура на „Македонијатурист“. „Промедика“ стана нов акционер и поседува 8,68 проценти од основната главнина на друштвото, а „Скопски пазар“ ја зголеми сопственоста на 10 проценти од основната главнина. Минатата недела во блок трансакција вредна 417,9 милиони денари (6,7 милиони евра) се продадоа 30.741 акција од „Македонијатурист“ коишто претставуваат 6,80 проценти од основната главнина на друштвото. Акциите се продадоа по цена од 13.597 денари за акција, којашто е многу повисока од просечната цена од 7.501 денар по која вчера се тргуваа акциите на компанијата.

Новата евиденција на Централниот депозитар за хартии од вредност за акционери кои поседуваат над пет проценти од основната главнина на друштвото сега покажува дека Доне Таневски, кој поседуваше 23,4 проценти од вкупниот број акции продал дел од своите акции во компанијата и сега поседува 17,72 проценти од вкупниот број акции. Втор најголем акционер во „Македонијатурист“ е „Скопски пазар“, компанија којашто ја зголеми сопстевеноста од 9,9 на 10 проценти од вкупниот број акции, а потоа следуваат „Македонијатурист“ која што поседува 10 проценти од сопствените акции, „Сава пензиски фонд“ (8,80 проценти), „Промедика“ (8,68 проценти), Симеон Павлов(8,19 проценти) и „МГ фешн“ (7,69 проценти).

Во „Македонијатурист“ веќе извесен период има обиди за окрупнување на капиталот и битно е да се нагласи дека сопствените акции на компанијата немаат право на глас во овој процес