Продадени 13 блока акции од „Македонијатурист“ за 9,8 милиони евра

Во тринаесет блок трансакции со вкупна вредност од 603,8 милиони денари (9,8 милиони евра) денеска на Македонската берза се продадоа вкупно 46.835 акции од „Македонијатурист“ АД Скопје. Акциите се продадоа по цени кои се движеа од 9.500 до 13.964 денари за акција.

Со ова продолжува низата мултимилионски блок трансакции со акциите на компанијата од изминатиов период. „Блумберг Адрија“ минатата недела пишуваше дека „Скопски пазар“ и „Современ ден“ го купија пакетот од 44.449 обични акции издадени од „Македонијатурист“ АД што на јавна берзанска аукција го понуди „Сава пензиски фонд“. Двете компании за овој пакет платија сума од 451,1 милиони денари (7,3 милиони евра). Акциите се продадоа преку моделот „се или ништо“ по почетната цена од 10.150 денари по акција.

Инаку, според евиденцијата на Централниот депозитар за хартии од вредност за акционери кои поседуваат над пет проценти од акциите, заклучно со денеска во „Македонијатурист“ меѓу поголемите акционери се Доне Таневски, кој поседува 17,72 проценти од вкупниот број акции, „Скопски пазар“ (17,30 проценти од вкупниот број акции), „Македонијатурист“ (10 проценти), „Промедика“(8,68 проценти), Симеон Павлов(8,9 проценти), „МГ Фешн“ (7,69 проценти). Останува да се види какви промени во сопственичката структура на „Македонијатурист“ ќе донесат денешните блок трансакции.