„Чезакомерц“ ја зголеми сопственоста во „Македонијатурист“

„Чезакомерц“ купи дополнителни 517 акции и сега поседува 28.675 акции односно 6,34 проценти од вкупниот број обични акции издадени од „Македонијатурист“ АД, соопшти компанијата преку Македонската берза.

„Блумберг Адрија“ во повеќе наврати пишуваше дека во „Македонијатурист“ има значителни промени во сопственичката структура и обиди за окрупнување на сопственичкиот капитал. Според податоците на Централниот депозитар за хартии од вредност, заклучно со 20 јануари меѓу акционерите коишто поседуваат над пет проценти од акциите освен „Чезакомерц“ се и „Скопски пазар“, која поседува 19,76 проценти од акциите и најголем поединечен акционер, „Промедика“ (11,90 проценти), „МГ Фешн“ (11,26 проценти), Симеон Павлов(10,47 проценти) и „Македонијатурист“ (10 проценти).

Пред десетина дена, „Македонијатурист“ по барање на акционерот „Скопски пазар“ распиша повик за вонредна седница на Собранието на акционери која ќе се одржи на 17 феваруари и на која треба да има промена на членовите на Надзорниот одбор на компанијата. Повеќето акционери коишто поседуваат над пет проценти од акциите веќе доставија свои предлози за нови членови на Надзорниот одбор.