Акциите на БЈД „полетаа“ во исчекување на подобрениот автопилот

Акциите на БЈД (BYD Co.) ја забележаа својата најдобра недела од крајот на 2020 година, бидејќи ентузијазмот на инвеститорите се зголеми пред долгоочекуваното ажурирање на технологијата за паметно возење на кинескиот производител на електрични возила.

Акциите на компанијата, котирани на берзата во Хонгконг, пораснаа за 21 отсто во текот на пет сесии, поттикнати од очекувањата дека производителот ќе покаже прогрес во системот за автопилот и ќе воведе повеќе интелигентни функции во своите нискобуџетни автомобили на настан закажан за понеделник.

Секој значителен пробив во технологиите за паметно возење на БЈД веројатно дополнително ќе ја интензивира конкуренцијата на кинескиот пазар за електрични возила, кој веќе е најголем во светот и каде што фирмата од Шенжен е лидер. Тоа може да помогне и во напорите на БЈД да навлезе на нови пазари во време кога високите тарифи за кинеските електрични возила наметнати од ЕУ и САД ја нарушуваат неговата перспектива.

„Забрзувањето на прогресот во автопилот-системите на БЈД ќе има значително влијание на пазарот, имајќи ја предвид неговата позиција како лидер во индустријата, па другите играчи, особено брендовите за масовен пазар, ќе го следат чекорот“, напишаа во белешка аналитичарите на „Голдман Сакс“ (Goldman Sachs Group Inc.), вклучувајќи ја и Тина Хоу, додавајќи дека банката очекува БЈД да ги сподели неодамнешните искуства од тестирањето на својот автопилот-систем „Божјо око“ (God's Eye).

Акциите на БЈД ја надминаа „Тесла“ годинава Bloomberg

Трката за развој и примена на технологии за асистенција во возењето се загрева во Кина, при што електричните возила се појавуваат како клучно бојно поле на тој план. Производителите на автомобили, особено фирмите за електрични возила, вклучувајќи ги „Тесла“ (Tesla Inc.) и „Експенг“ (XPeng Inc.), инвестираа многу и се обидоа да ги убедат потрошувачите да ги изберат нивните производи што би можеле да бидат побезбедни и поудобни.

Функциите станаа главна точка за продажба за некои клиенти и клучен диференцијатор за некои од брендовите на автомобили. Додека целосно автономните возила сè уште не се широко достапни, кинеските компании ги поместуваат границите. Многумина ги применија функциите за асистирано возење не само на автопатиштата туку и на покомпликуваните урбани патишта.

Стартапите, вклучувајќи ги „Нио“ (Nio Inc.) и „Експенг“, се фокусираат на развој на сопствени чипови и софтверски пакети, овозможувајќи поголема контрола и оптимизација на системите. Понатаму, интеграцијата на технологии за паметни кабини, вклучувајќи напредни асистенти со вештачка интелигенција и интерактивни дисплеи, се очекува да го подобри целокупното искуство при возењето.

Опциите за кинеските производители на електрични возила беа во подем неделава. Во четвртокот тие достигнаа највисоко ниво од март за БЈД, со повеќе од 22.000 тргувани договори. Обемот беше над тројно поголем од 20-дневниот просек во петокот.

За „Ли ауто“ (Li Auto Inc.), повеќе од 35.000 опции беа тргувани во петокот, најмногу од мај, додека за „Гили“ (Geely Automobile Holdings Ltd.) обемот достигна речиси 9.000 договори, највисоко ниво во повеќе од четири месеци. 

БЈД има за цел продажба на пет-шест милиони електрични и хибридни автомобили во 2025 година, зголемување од 4,27 милиони испорачани минатата година. Производителот на автомобили од Шенжен ја заврши 2024 година како осма најголема автомобилска група во светот според продажбата.