„Кока-Кола“ гледа спас и инвестира во млеко наместо во сокови, но Волстрит очекува повеќе

Кога влегувате во канцеларијата на „Кока-Кола“ (Coca-Cola) во Чикаго го нема иконското лого на гигантот за безалкохолни пијалаци. На неговото место стои џиновско ѕвонче од крави.

Внатре, неколкумина од 900-те вработени - наречени супердегустатори - усовршуваат и внимателно чуваат една од највредните формули на оваа огромна компанија. Но тие работници не пијат „кока-кола“ или „спрајт“. Тие пијат млеко.

„Ферлајф“ (Fairlife) го филтрира млекото со цел да ги зголеми протеините, да го преполови шеќерот и да ја елиминира лактозата, а исто така, според обожавателите, е покремаст. Тоа помогна да стане најбрзорастечкиот американски бренд на „Кока-Кола“ и од клучно значење за нејзината стратегија за раст да се движи подалеку од безалкохолните пијалаци.

„’Ферлајф’ прерасна во одличен бизнис“, рече главниот извршен директор Џејмс Квинси, 60-годишен Британец, кој е на чело на компанијата речиси осум години.

Bloomberg Mercury

Откако стана извршен директор, Квинси им предлагаше на инвеститорите „Кока-Кола“ да стане компанија за сите пијалаци за да го надомести бавното пропаѓање на газираните пијалаци, кои сė почесто се надвор од игра поради сѐ поголемата свесност на луѓето за своето здравје. Тој потроши милијарди за да влезат во бизнисот со кафе и спортски пијалаци. „Ферлајф“ убедливо најмногу се истакнува. И покрај тоа што е околу трипати повисока од традиционалната цена на обичното млеко, неговата продажба на мало надмина една милијарда долари во 2022 година, што е за 1.000 проценти повеќе од 90-те милиони долари остварени во 2015 година, кога ова млеко беше лансирано на американскиот пазар.

Но на компанијата ќе ѝ требаат многу повеќе производи како „ферлајф“ за да го освои Волстрит.

Тој производ претставува само дел од една компанија што генерира приходи во висина од околу 46 милијарди долари, што го отежнува намалувањето на нејзината зависност од газираните сокови. Околу 60 проценти од вкупната продажба отпаѓаат на газираните сокови, додека готовите пијалаци, како што е сокот од портокал, го сочинуваат остатокот. Тој сооднос едвај попуштил во изминатите шест години. Инвеститорите веќе утре ќе добијат ажурирање за напредокот во диверзификацијата на приходите од „Кока-Кола“, кога компанијата ќе ги објави резултатите од четвртиот квартал.

Bloomberg Mercury

А компанијата инаку неодамна извести дека ги зголемува цените за да се спротивстави на инфлацијата и дека растот не е резултат на поголем обем на продажба. Во последниот квартал цените се зголемија за 10 проценти, додека обемот на продадени производи се намали за еден отсто.

„Пепси“ (PepsiCo), најголемиот конкурент на „Кока-Кола“, е многу поинаква компанија, каде што околу 60 проценти од нејзината продажба доаѓа од прехранбените брендови, како што е „Доритос“ (Doritos). Но и таа компанија се мачи да транзитира кон поздравите опции, иако нејзиното купување на „Сиете фудс“ (Siete Foods) во вредност од 1,2 милијарда долари минатата година и проширувањето на линијата на производи без вештачки состојки може да сигнализираат некаков пресврт.

Акциите на „Кока-Кола“ имаат драстично слаби перформанси на поширокиот пазар. Откако во февруари 2020 година генерално сите акции паднаа во САД, погодени од пандемијата, индексот S&P 500 се зголеми за 80 проценти над нивото од пред ковид. Во меѓувреме, акциите на „Кока-Кола“ се зголемија само за околу шест отсто, а тие на „Пепси“ се уште помалку променети.

Движење на вредноста на акциите на „Кока-Кола“ Bloomberg Mercury

Ова ја прави иднината на компанијата уште позависна од „ферлајф“.

„Брендот на млеко станува клучен двигател на растот, помагајќи да се компензира падот на продажбата на многу засладени, покалорични безалкохолни пијалаци на компанијата. Откако ‘Кока-Кола’ ја презеде контролата и ја прошири дистрибуцијата, ‘ферлајф’ сега е навидум насекаде“, рече Гарет Нелсон, аналитичар во ЦФРА (CFRA).

Големите придобивки на „ферлајф“ се совпаѓаат со лудилото по „оземпик“ Bloomberg Mercury

Големите придобивки на „ферлајф“ се совпаѓаат со лудилото по „оземпик“ (Ozempic). Луѓето што земаат лекови за слабеење се охрабруваат да консумираат повеќе протеини за одржување на мускулите, а една чаша „ферлајф“ има 13 грама протеини наспроти осумте во обичното млеко. Брендот нуди и шејкови со уште повеќе протеини, вклучувајќи го и „кор пауер“ (Core Power), кој има верзија со околу 24 грама протеини по чаша.

 

Во моментов нема коментари за веста. Биди прв да коментира...

Остави коментар