Царините на Трамп почнаа да ѝ се удираат од глава на „Тесла“

„Тесла“ (Tesla Inc.) изразува загриженост околу потенцијалните одмазднички потези на други земји како што ескалира трговската војна по потезите на претседателот Доналд Трамп со воведувањето царини за широк опсег на увозни добра.

Производителот на електрични автомобили неделава ја предупреди администрацијата дека какви било потези од тој тип може да ги зголемат трошоците за производство и да ги направат неговите возила помалку конкурентни на меѓународните пазари.

„Американските извозници секогаш се изложени на непропорционални влијанија кога другите земји реагираат на американските трговски политики“, изјавија од  „Тесла“ во писмото од 11 март испратено до трговскиот претставник во администрацијата на Трамп,  Џејмисон Грир. „Минатите трговски активности на САД веднаш резултираа со реакции од погодените земји, вклучувајќи и зголемени царини  за електричните возила увезени во тие земји“.

Потезите на Трамп во трговската политика во последните недели - вклучувајќи и објавување, а потоа одложување на царините за соседните земји, наметнување давачки за увоз на метали и закани со значителни давачки за одредени европски стоки - ја потресоа глобалната економија. Автомобилската индустрија, особено, се подготвува за силни потреси поради потезите што се закануваат да ги нарушат синџирите на снабдување и да додадат илјадници долари на цените на автомобилите.

Овие најнови коментари на „Тесла“ се рефлексија на загриженоста искажана уште на крајот на јануари од страна на главниот финансиски директор Ваибхав Танеџа, кој изјави дека „воведувањето царини, кое е многу извесно, и потоа какви било реципрочни мерки од другата страна ќе им наштетат на нашиот бизнис и профитабилност“.

„Тесла“ во своето писмо од неделава ја повика администрацијата да ги разгледа ефектите што нејзините потези можат да ги имаат врз синџирот на снабдување кај електричните возила и батерии, кои остануваат многу зависни од другите земји.

„Дури и со агресивна локализација на синџирот на снабдување, одредени делови и компоненти е тешко или невозможно да се набават во САД“, велат од компанијата.

Писмото, кое беше објавено претходно од „Фајненшл тајмс“, беше вклучено во јавните коментари до канцеларијата на трговскиот претставник на САД додека агенцијата проверува дали американските бизниси би можеле да бидат повредени од трговските практики. „Тесла“ не одговори веднаш на барањето од „Блумберг“ за коментар.

Трговската војна е уште еден  предизвик од мноштвото  со кои се соочува производителот на автомобили, вклучувајќи ги и намалената продажба на клучните пазари, остриот пад на акциите годинава, случаите на вандализам во салоните на „Тесла“ и реакциите против главниот извршен директор Илон Маск, кој игра значајна улога во администрацијата на Трамп во моментов.

На пример, Британска Колумбија, третата најнаселена провинција во Канада, неделава ги повлече владините субвенции за луѓето да инсталираат полначи за „Тесла“ во нивните домови. Премиерот на провинцијата Дејвид Еби на прес-конференција во четвртокот рече дека потегот е директно насочен кон извршниот директор и милијардер, со објаснување дека жителите не сакаат нивните пари да му бидат од каква било корист на Маск.

-Со помош на Томас Сил

Во моментов нема коментари за веста. Биди прв да коментира...

Остави коментар