Почна штрајкот на „Ер Канада“, приземјени се стотина авиони

Околу 10.500 стјуарди и стјуардеси на „Ер Канада“ штрајкуваат денеска, суспендирајќи стотици летови и попречувајќи 130.000 патници, колку што во просек превезува компанијата на дневно ниво во екот на празничната сезона, да пристигнат до својата цел. Ова е резултат на неуспешните преговори за покачување на платите.

„Сега официјално сме во штрајк“, соопштија од „Ер Канада“, чии вработени се дел од Канадскиот синдикат на јавни службеници, во објава на својата интернет-страница.

Во посебна изјава „Ер Канада“ потврди дека ги суспендира сите операции на својата главна линија и нискобуџетскиот бренд „Руж“ (Rouge). Авиокомпанијата со седиште во Монтреал, која инаку е најголемата во Канада, неделава веќе извести дека ќе ја блокира работата на стјуардите по 1:30 часот наутро во сабота по локално време. Авиопревозникот откажа повеќе од 600 летови.

„Ер Канада длабоко жали за ефектот што штрајкот го има врз клиентите“, соопшти авиокомпанијата.
Владата на Канада не се изјасни пред крајниот рок за почеток на штрајк (во 00:58 часот по њујоршко време) и покрај интервенциите за спречување на претходните прекини на работата под водство на поранешниот премиер Џастин Трудо.

Depositphotos

 

„Ер Канада“ може да биде изложена на ризик да губи по 75 милиони канадски долари (околу 54 милиони американски долари) од заработката пред камати, даноци и амортизација за секој ден кога ќе има прекин на работата, напиша аналитичарот на „ТД Ковен“ (TD Cowen), Том Фицџералд, во неговото вчерашно соопштение до клиентите. Карго операциите на авиокомпанијата исто така ќе бидат засегнати, но не и регионалните летови на „Ер Канада експрес“, бидејќи тие ги управува трета страна.

Платите беа главна точка на сопнување во преговорите. „Ер Канада“ соопшти дека понудила зголемување на вкупните надоместоци, вклучувајќи ги бенефициите и бонусите, за 25 проценти во првата година и за 38 отсто во текот на четири години, како и дека се согласила да им плаќа на работниците за дел од времето што го поминуваат на земја. Во моментов стјуардесите на „Ер Канада“ се платени само кога авионот е во движење, а не и за другата работа како што е качувањето во авион – што е вообичаена пракса во индустријата.

Depositphotos

 

Синдикатот пресмета дека тој предлог всушност би претставувал зголемување на платата од 17,2 проценти во текот на четири години. Оттаму соопштија дека помладиот придружник заработува 1.952 канадски долари месечно пред оданочување, и дека најдобриот предлог на „Ер Канада“ за првата година е зголемување од осум отсто, што би го покачил приходот на 2.108 канадски долари месечно, а тоа е за над 700 канадски долари помалку од минималната плата на федерално ниво со полно работно време.

Штрајкот ги уништува надежите дека туристите сепак ќе летаат, како што претходно се случи со договорот посигнат во последен момент во случајот кога минатиот септември пилотите на „Ер Канада“ се заканија дека ќе штрајкуваат.

Акциите на „Ер Канада“ влера во тргувањето во Торонто затворија со раст од 0,6 проценти, но во текот на оваа година бележат пад на вредноста од над 11 проценти.