Македонската телевизиска индустрија лани почнала полека, но сигурно да закрепнува од влијанието на пандемијата. За разлика од 2020 година кога имаше остар пад во приходите на најголемите телевизии во земјава, лани бројките тргнаа нагоре, покажува годишниот извештај на Агенцијата за аудио и аудиовизуелни медиумски услуги за 2021 година.
„Сепак, сè уште не може да се достигне нивото од предпандемиската 2019 година, а не пак да се зборува за некаков раст на пазарот, особено поради тоа што значаен дел од приходите на телевизиите и радијата во анализираната година е од финансиска помош од државата“, пишува во извештајот.
Вкупните приходи во индустријата во 2021 година изнесувале 43,2 милиони евра. Ова е највисок износ на вкупни приходи во последните пет години. Но, високата сума се должи на помошта што телевизиите се уште ја добиваат од државата за справување со последиците од пандемијата.
Повеќе од половина од приходите се остварени од рекламирање, дури 54 отсто. Но, и во овој случај добар е уделот на политиката во приходите затоа што доаѓаат од политичките партии како пари за платено политичко рекламирање (ппр) пред избори.
„Радиодифузерите во 2021 година оствариле највисоки вкупни приходи од рекламирање во последните пет години, но доколку се одземат приходите од платено политичко рекламирање, приходите од рекламирање во 2021 година се уште не ги достигнуваат оние од пред пандемијата“, стои во извештајот.
Растот на вкупните трошоци во индустријата лани е незначителен - тие се зголемиле за 6% во споредба со претходната година.
Државата и должи на МРТ
Вкупните приходи на Македонската радиотелевизија во 2021 година изнесувале 15,9 милиони евра и во однос на 2020 година тие се пониски за 3,22%.
Над 95% од вкупните приходи се средствата за финансирање на јавниот сервис и т.н. останати деловни приходи. И оваа година на јавниот сервис му биле префрлени помалку средства од државниот буџет отколку што е предвидено со законот. Владата на јавниот сервис му префрлила само 59% од законски предвидениот износ.
Трошоците за вработени биле највисока ставка во вкупните трошоци на јавниот сервис. Тие изнесувале 47,16% од вкупно направените трошоци. Најголем дел од нив се бруто плати за вработените, 7,4 милиони евра.
Трошоците за програмски права, меѓу нив и исклучително скромната понуда на спортски наптревари, изнесувале 4,5 милиони евра. Во МРТВ во 2021 година вработени биле 704 лица.
Приватните телевизии се зависни од парите на државата и политичките партии
Во 2021 година, заедничките приходи на терестријалните телевизии кои емитуваат програма на територијата на целата држава значително се зголемиле во однос на претходната година (за 24%) и оваа година изнесуваат 19,6 милиони евра.
Пораст на вкупните приходи има кај сите пет телевизии, но најголемо зголемување има кај АлсатМ - за 31% и кај Алфа - за 30%. Приходите на Сител се зголемиле за 25%, на Канал 5 за 22% и на Телма за 12%.
Од овие пари, помалку од 5 милиони евра завршиле за плати и хонорари за 749 ангажирани лица. Најмногу средства телевизиите издвоиле за набавка на содржини, близу 6 милиони евра.
Во вкупните приходи на овие телевизии е опфатена и финансиската помош од државата, во висина од 685.000 евра за сите пет телевизии, како поддршка за справување со кризата од пандемијата од вирусот Ковид-19.
За секоја телевизија државата обезбедила по 45.000 евра за надомест на трошокот за дозволата за емитување и по 90.000 евра за надомест за трошокот за пренос на сигналот преку терестријалниот дигитален мултиплекс.
Покрај тоа, освен ТВ Алсат-М, останатите четири телевизии користеле и субвенции за придонеси од плата за вработените во вкупен износ од над 300.000 евра
ТВ Алфа е единствената телевизија којашто прикажала приходи од продажба на содржини.
Економските податоци за овие пет телевизии покажуваат дека тие генерално се финансираат од продажба на времето за рекламирање, освен Алфа, кај која доминантен извор на финансирање во 2021 година била продажбата на содржини.
Приходите од рекламирање изнесувале 16,4 милиони евра, што претставува 83,6% од вкупните остварени приходи.
Во овој износ се вклучени и приходите коишто петте телевизии ги оствариле од платено политичко рекламирање за време на локалните избори во 2021 година, во вкупен износ од близу 1,8 милиони евра. Најмногу пари од политичките партии добила Канал 5 , близу 500.000 евра, следи Алсат М со 470.000, Сител со 450.000, Телма со 220.000, Алфа 130.000 евра
Во периодот од 2017 до 2021 година, Сител секогаш имала најголем удел во вкупните приходи од реклами кои ги остварувале петте терестријални телевизии.
Во периодот од последните пет години, за прв пат во анализираната година сите пет телевизии оствариле добивка. Нивната вкупна добивка изнесувала околу 850.000 евра. Најголема добивка имале Алсат-М и Сител.
Во анализираниот период, најгледана телевизија била Сител, веднаш зад неа Канал 5.
.webp){kind=icon}
Во моментов нема коментари за веста. Биди прв да коментира...