„Ексон“ ќе отпушти 2.000 работници, загубите на работни места во нафтениот сектор растат

„Ексон мобил“ (Exxon Mobil Corp.) планира да укине околу 2.000 работни места на глобално ниво, додека нафтената компанија од Тексас ги консолидира помалите канцеларии во регионални центри како дел од својата долгорочна стратегија за преструктурирање.

Намалувањето претставува околу 3-4 отсто од вкупната глобална работна сила на „Ексон“ и е дел од тековниот процес за зголемување на ефикасноста, се наведува во меморандумот што извршниот директор Дарен Вудс го испратил до вработените. „Империјал оил“ (Imperial Oil Ltd.) со седиште во Калгари, во која „Ексон“ поседува речиси 70 отсто, во понеделникот објави дека ќе укине 20 отсто од својата работна сила.

„Шеврон“ (Chevron Corp.), „Коноко Филипс“ (ConocoPhillips) и БП (BP Plc) се меѓу големите нафтени компании што исто така најавија илјадници отпуштања во последните месеци, откако цените на суровата нафта паднаа годинава поради зголеменото снабдување од ОПЕК+ и неговите сојузници. „Ексон“, сепак, од 2019 година спроведува големо внатрешно преструктурирање, откако Вудс се заложи за поедноставување на глобалното работење на компанијата што произлезе од спојувањето со „Мобил“ пред две децении.

„‘Ексон’ носи ‘тешки одлуки’, кои се надоврзуваат на повеќегодишните напори за подобрување на конкурентноста“, напиша Вудс. „Промените што ги најавивме денес дополнително ќе ги зајакнат нашите предности и ќе ја зголемат разликата со конкуренцијата, помагајќи ни да останеме лидер во децениите што доаѓаат“, додаде тој.

Компанијата не коментираше дополнително надвор од неговиот допис до вработените.

Регионалните центри ќе се фокусираат на главните проекти за раст на „Ексон“, како што се експлоатацијата на нафта во Гвајана, производството на течен природен гас по должината на Заливскиот брег и глобалната трговија. На пример, компанијата неодамна најави планови за преместување на вработените од Брисел и Лезерхед, Велика Британија, во централен Лондон, каде што е концентриран дел од нејзиниот трговски тим.

Работната сила во „Ексон мобил“
Бројот на вработени во нафтениот гигант беше во опаѓање и пред најновите кратења

Bloomberg

„Ексон“ имаше девет функционални компании што работеа релативно независно една од друга кога Дарен Вудс ја презеде функцијата во 2017 година, што создаде повеќе нивоа на бирократија и дуплирање на услугите за поддршка. Сега компанијата има три главни сектори – производство, рафинирање и сектор за енергетски проекти со намалени емисии на јаглерод – кои споделуваат заеднички услуги како инженеринг, ИТ и управување со проекти.

Овие промени ѝ помогнаа на „Ексон“ да намали 13,5 милијарди долари годишни трошоци од 2019 година наваму, повеќе од сите други меѓународни нафтени гиганти заедно, покажуваат податоците на компанијата. Планот е оваа бројка да се зголеми за уште 30 отсто до крајот на деценијата.

Дел од заштедите е остварен преку продажба на средства и намалување на бројот на вработени, но Вудс вели дека промените донеле и подобри резултати, како подобрено одржување на големите постројки и подобро споделување на најдобрите практики меѓу деловните единици.

Според годишните извештаи на компанијата, „Ексон“ имал 61.000 вработени низ светот на крајот на 2024 година, речиси 20 отсто помалку отколку во 2019 година. „Империјал оил“ имал 5.100 вработени на крајот на 2024 година.