„Нетфликс“ понуди исплата во кеш, се вжештува борбата за „Ворнер Брос“

„Нетфликс“ (Netflix Inc.) и „Ворнер Брос“ (Warner Bros. Discovery Inc.) потпишаа ревидиран договор за целосна исплата во готово за продажба на студиото и стриминг-бизнисот на „Ворнер“, како продолжение на борбата за преземање на оваа култна медиумска компанија. Новиот договор, кој беше објавен преку поднесен документ и потврден од страна на „Блумберг њуз“, подразбира дека „Нетфликс“ ќе ја исплати целосната сума во кеш, за разлика од претходната понуда, која вклучуваше комбинација на акции и готовина.

Измените во договорот доаѓаат по критиките од страна на „Парамаунт“ (Paramount), компанија што тврдеше дека понудата на „Нетфликс“ е инфериорна поради присуството на акции. „Парамаунт“, компанија мајка на Си-би-ес (CBS) и Ем-ти-ви (MTV), веќе поднесе понуда од 30 долари по акција и се обидува да го привлече вниманието на инвеститорите за да ја прифатат понудата.

Борбата за „Ворнер Брос“ се смета за една од најголемите медиумски трансакции во последниве години, која има потенцијал да го промени пејзажот на индустријата за забава. „Парамаунт“ активно ја следи трансакцијата веќе од септември, додека „Нетфликс“, лидерот во светот на стримингот, се појави како неочекуван конкурент за купување на „Ворнер Брос“ по објавувањето на продажбата на компанијата во октомври.

Со новата понуда, „Нетфликс“ го елиминира главниот аргумент на „Парамаунт“. Според новите услови, акционерите на „Ворнер Брос“ ќе имаат можност да гласаат за трансакцијата до април годинава.

Спојувањето на „Ворнер Брос“ и „Нетфликс“ би донело обединување на две од најголемите стриминг-платформи во светот, со околу 450 милиони комбинирани претплатници. Тоа би овозможило „Нетфликс“ да ги зајакне своето присуство и колекцијата со премиум содржини, за да се спротивстави на конкуренцијата од „Волт Дизни“ (Walt Disney Co.) и „Амазон“ (Amazon.com Inc). Ова е важен момент за индустријата, додека сè погласно се изразува загриженоста од страна на синдикатите на холивудските работници и сопствениците на киносали што се плашат дека ваквото поврзување може да им наштети на нивните интереси.

Што се случува со кабелските мрежи?

„Ворнер Брос“ ќе ги подели своите кабелски мрежи во нова компанија, „Дискавери глобал“ (Discovery Global), која ќе им биде отстапена на акционерите на „Ворнер Брос“ и која ќе има значителни долгови. Според поднесениот документ, „Дискавери глобал“ ќе има 17 милијарди долари долг до 30 јуни 2026 година, со намера тој долг да се намали на 16,1 милијарди до крајот на годината.

Тимовите на „Нетфликс“ и на „Ворнер Брос“ исто така договараат ревидирање на долгот, кој ќе биде намален за 260 милиони долари благодарение на паричната флуксација на компанијата, која во изминатата година е поголема од очекуваната.

Додека „Парамаунт“, водена од Давид Елисон, продолжува да инсистира на својата понуда како подобра, стратегијата на оваа компанија не успеа да го убеди управниот одбор на „Ворнер Брос“ и голем број од акционерите. Според Елисон, со спојување со „Парамаунт“ би се задржал традиционалниот холивудски модел и би се зачувало наследството на „Ворнер Брос“, но засега тоа не го убедува мнозинството од акционерите, кои се разделени во однос на понудата.

„Нетфликс“, пак, останува уверен дека неговата понуда ќе биде одобрена од регулаторите и се очекува соодветните резултати да бидат објавени по завршувањето на четвртиот квартал на 2026 година.

Дали овој договор ќе се реализира или „Парамаунт“ ќе излезе како победник во битката за „Ворнер Брос“ ќе биде познато во следните месеци, кога акционерите и регулаторите ќе ги разгледаат финалните понуди и услови.