„Нетфликс“ рефинансираше дел од кредитот на понудата за „Ворнер Брос“

„Нетфликс“ (Netflix Inc.) рефинансираше дел од кредитот од 59 милијарди долари за да го поддржи потенцијалното преземање на „Ворнер Брос дискавери“ (Warner Bros. Discovery Inc).

Стриминг-гигантот обезбеди револвинг кредит од пет милијарди долари и два кредита со одложен рок за исплата од 10 милијарди долари за рефинансирање дел од премостувачкиот кредит што компанијата го зеде за својата понуда за „Ворнер Брос“, пишува во поднесеното барање денеска.

На почетокот на декември „Нетфликс“ се согласи на договор со кој студиските и стриминг-средствата на „Ворнер Брос“ се проценуваат на 82,7 милијарди долари. „Парамаунт скајденс“ (Paramount Skydance Corp.) потоа започна непријателска понуда за преземање, предизвикувајќи војна на лицитации што ќе ја преобликува индустријата за забава без оглед на победникот. Конкурентските понуди вклучуваат договори за долгови од повеќе милијарди долари, кои се рангираат меѓу најголемите во изминатата деценија.

„Ворнер Брос“ минатата недела ги советуваше своите акционери да ја отфрлат понудата на „Парамаунт“ во корист на оригиналниот договор со „Нетфликс“. „Ворнер Брос“ ја опиша понудата на „Парамаунт“, која за целата компанија вклучува 54 милијарди долари обврски за долг, како „инфериорна и несоодветна“ и рече дека финансирањето на договорот е премногу ризично.

Иако „Нетфликс“ има поддршка од одборот на „Ворнер Брос“, сепак се соочува со регулаторни и политички пречки за да ја реализира аквизицијата. Демократската сенаторка Елизабет Ворен од Масачусетс ја нарече понудата „антимонополска ноќна мора“, а „Нетфликс“ се обиде да ги увери вработените дека тоа нема да резултира со затворање студија.

Премостувачки кредити

„Велс Фарго“ (Wells Fargo & Co.), „БНП Париба“ (BNP Paribas SA) и „ХСБЦ холдингс“ (HSBC Holdings Plc) се меѓу банките што му обезбедија на „Нетфликс“ необезбеден премостувачки кредит. (Краткорочен кредит наменет да обезбеди финансирање за време на преоден период, кој помага да се „премости“ јазот помеѓу продажбата на еден имот и купувањето на друг. Овие кредити можат да се добијат побрзо од традиционалните хипотекарни кредити и обично се користат за олеснување  брзи трансакции со недвижности.)

Премостувачките заеми ги покриваат непосредните празнини во финансирањето и најчесто ги користат компаниите што подготвуваат понуди за откуп. Тие обично се заменуваат со потрајни и поевтини кредити неколку недели или месеци подоцна.

Во случајот на „Нетфликс“, фирмата планира да ги искористи пазарите на капитал за дополнително да го намали својот премостувачки кредит и да го продолжи рокот на отплата на долгот. Кога ќе се случи тоа, долгот веројатно ќе биде оценет со инвестициски рејтинг бидејќи „Нетфликс“ има рејтинг А3 од „Мудис рејтингс“ (Moody’s Ratings) и А од „СП Глобал рејтингс“ (S&P Global Ratings).

„Нетфликс“ во првите денови на своето работење се потпираше на пазарот на обврзници со т.н. високоризични (junk-bond) обврзници, но доби пристап до поевтино финансирање кога во 2023 година беше надграден во статус на блучип-компанија.