Зетот на Трамп се повлекува и од битката за преземање на „Ворнер Брос“

Приватниот инвестициски фонд на зетот на Доналд Трамп, Џаред Кушнер, „Афинити партнерс“ (Affinity Partners), се повлекува од битката за преземање на „Ворнер Брос“ (Warner Bros. Discovery Inc).

Потегот доаѓа во момент додека „Ворнер Брос“ планира да ја одбие понудата на „Парамаунт скајденс“ (Paramount Skydance Corp.), која беше поддржана од фирмата на Кушнер.

„Афинити партнерс“ месецов се појави како учесник во непријателската понуда на „Парамаунт“ за „Ворнер Брос“, која ја вреднуваше познатата холивудска компанија на 108,4 милијарди долари, вклучувајќи го и долгот. „Парамаунт“ се обидува да го спречи договорот на „Нетфликс“, кој претходно понуди 82,7 милијарди долари за „Ворнер Брос“.

По разгледувањето на понудата на „Парамаунт“, управниот одбор на „Ворнер Брос“ ќе ги повика акционерите, почнувајќи од денес, да ја одбијат понудата, велат луѓе запознаени со ситуацијата. Управниот одбор на „Ворнер Брос“ сè уште смета дека постојниот договор со „Нетфликс“, водечката платформа за стриминг, нуди поголема вредност, сигурност и услови од она што го предложи „Парамаунт“, велат изворите, кои побарале да останат анонимни поради доверливоста на информациите.

„Афинити партнерс“ помагаше во финансирањето на потегот на „Парамаунт“. Учеството на Кушнер, во договорот за кој претседателот изјави дека лично ќе го прегледа, привлекло многу непожелно внимание врз него, велат луѓе запознаени со одлуката. Приносот од 200 милиони долари на „Афинити партнерс“ за финансирање бил релативно мал, додаваат тие.

Динамиката на инвестицијата се променила откако „Афинити партнерс“ започна да учествува во процесот во октомври, изјавил претставник на фирмата.

Џаред Кушнер

„Со двајца силни конкуренти што се борат да ја обезбедат иднината на овој уникатен американски имот, ‘Афинити партнерс’ одлучи да не продолжува со следење на оваа можност“, се наведува во изјавата на инвестициската фирма. „Сè уште веруваме дека има силна стратегиска оправданост за понудата на ‘Парамаунт’“.

Еден од главните проблеми во договорот е загриженоста на „Ворнер Брос“ во врска со финансирањето предложено од „Парамаунт“, кое го води Дејвид Елисон. Капиталот е поддржан од фонд што управува со богатството на таткото на Елисон, софтверскиот милијардер Лари Елисон. Бидејќи станува збор за фонд од кој средствата може да се извлечат во кој било момент, „Ворнер Брос“ може да остане без ресурси ако се случи тоа, известува „Блумберг њуз“.

Претставници на „Ворнер“ и на „Парамаунт“ одбија да коментираат.

Битката за „Ворнер Брос“ има потенцијал да ја промени индустријата за забавни содржини, без оглед на тоа кој понудувач ќе излезе како победник. Со филмовите и сериите на компанијата, „Нетфликс“ ќе има огромна моќ врз содржината што ќе ѝ ја понуди онлајн на публиката. Од друга страна, „Парамаунт“ има намера да спои две историски холивудски студија за да го спречи влијанието на „Нетфликс“, „Волт Дизни“ (Walt Disney Co.) и „Амазон“ (Amazon.com Inc).

 

Понудата на „Парамаунт“ исто така се финансира од страна на влијателни инвеститори од Блискиот Исток, вклучувајќи ги јавниот инвестициски фонд на Саудиска Арабија и Катарскиот инвестициски фонд, како и малку познатата група од Абу Даби наречена „Лимад холдинг“ (L’imad Holding Co). Кушнер има силни врски со Блискиот Исток. Тој ја основал „Афинити партнерс“ во 2021 година со средства од суверени фондови на овој регион.

Оваа недела „Блумберг њуз“ извести дека „Афинити партнерс“ ги повлекува плановите за хотел во Србија откако тензиите околу проектот кулминираа со обвинение врз владин официјален претставник што помогнал да се овозможи патот кон развој на проектот.