„Нетфликс“ ја напушти трката за „Ворнер Брос“, „Парамаунт“ го купува студиото за 111 милијарди долари

„Нетфликс“ (Netflix) се повлече од трката за преземање на „Ворнер“ (Warner Bros. Discovery Inc.), со што ѝ го отвори патот на конкурентската „Парамаунт скајденс“ (Paramount Skydance Corp.) да го финализира договорот вреден 111 милијарди долари за историското холивудско студио.

Лидерот во стриминг-индустријата соопшти дека, иако верува дека неговата понуда би добила регулаторно одобрување и би создала вредност за акционерите, не сака да продолжи со наддавање.

„Отсекогаш сме биле дисциплинирани. Со цената што требаше да ја понудиме за да ја изедначиме последната понуда на ‘Парамаунт’, договорот повеќе не ни е финансиски исплатлив“, соопшти „Нетфликс“ во четвртокот. Наместо тоа, компанијата ќе продолжи да инвестира во сопствениот бизнис, вклучувајќи и околу 20 милијарди долари годинава во филмови, ТВ-серии и друга забавна содржина.

Акциите на „Нетфликс“ скокнаа за најмногу 13 отсто во тргувањето по работното време, што укажува дека инвеститорите позитивно ја оценија одлуката компанијата да се повлече од договорот. Акциите на „Ворнер Брос“ паднаа, бидејќи повеќе не се очекува наддавање меѓу понудувачите. Акциите на „Парамаунт скајденс“ беа речиси непроменети.

„Нетфликс“ во декември склучи договор вреден 82,7 милијарди долари, вклучувајќи и преземен долг, за купување на студиските и стриминг-бизнисите на „Ворнер Брос“. Но повторените контрапонуди од „Парамаунт“ за целата компанија ја одржуваа аукцијата отворена. До доцна во четвртокот „Ворнер Брос“ ја оцени најновата понуда на „Парамаунт“ од 31 долар по акција како супериорна.

„Откако нашиот одбор ќе гласа за усвојување на договорот за спојување со ‘Парамаунт’, тој ќе создаде огромна вредност за нашите акционери“, изјави извршниот директор на „Ворнер Брос“, Дејвид Заслав. „Возбудени сме од потенцијалот на комбинираната ‘Парамаунт’ и ‘Ворнер Брос’ и едвај чекаме да почнеме заедно да ги раскажуваме приказните што го движат светот.“

Одлуката на „Нетфликс“ да не ја зголеми понудата „го расчисти патот акционерите да добијат значително повеќе готовина и реална можност за добивање владини одобренија“, соопшти „Анкора“ (Ancora Holdings Group), активистички инвеститор во „Ворнер Брос“. „Ова е добивка и за акционерите и за индустријата.“

Битката за преземање беше жестока и во Холивуд и во Вашингтон. И коизвршниот директор на „Нетфликс“, Тед Сарандос, и извршниот директор на „Парамаунт“, Дејвид Елисон, оваа недела отпатуваа во главниот град на САД на средби со законодавци.

Сарандос во четвртокот поминал околу еден час со претставници на администрацијата на Доналд Трамп.

„Денес не давам изјави за медиумите“, рече тој при излегувањето од Белата куќа.

Елисон присуствуваше на обраќањето на Трамп во вторникот како гостин на Линдзи Грем, републикански сенатор од Јужна Каролина. Грем беше забележан и во Белата куќа во четвртокот.

„Парамаунт“ ќе се соочи со дополнителна контрола околу договорот. Комитетот за правосудство на Сенатот на САД закажа сослушување за 4 март за повторно разгледување на продажбата на „Ворнер“, по сослушувањето одржано во текот на овој месец. Сенаторот од Њу Џерси, демократот Кори Букер, повторно му упати покана на Елисон да присуствува.

И Елизабет Ворен, демократка од Масачусетс, се огласи за договорот со „Парамаунт“. „Спојувањето на ‘Парамаунт скајденс’ и ‘Ворнер Брос’ е катастрофа од аспект на конкуренцијата што се заканува со повисоки цени и помал избор за американските семејства“, наведе таа во соопштение. „Мал број милијардери блиски до Трамп се обидуваат да ја преземат контролата врз тоа што гледате и да ви наплатуваат цена каква што ќе посакаат.“

„Нетфликс“, како прв пионер во онлајн телевизијата, изгради профитабилен бизнис со повеќе од 325 милиони корисници низ светот што плаќаат месечна претплата за филмови и ТВ-серии.

Традиционалните филмски и ТВ-продуценти како „Парамаунт“ и „Ворнер Брос“ лансираа сопствени стриминг-платформи, но немаат споредлив број претплатници со ривалите, додека нивните класични телевизиски мрежи губат гледачи и огласувачи.

Понудата на „Парамаунт“ ги опфати и кабелските ТВ-мрежи на „Ворнер Брос“, како „Си-ен-ен“ и „Те-ен-ти“ (TNT). Компанијата ја започна трката со приватна понуда во септември, само еден месец откако Елисон го финализира спојувањето на неговата „Скајденс медија“ со „Парамаунт“, со што доби контрола врз филмското студио, стриминг-сервисот и ТВ-мрежите како „Си-би-ес“ и „Ем-ти-ви“.

„Ворнер Брос“ започна да собира понуди за бизнисот во октомври, а во декември да го финализира договорот со „Нетфликс“.

Откако на изглед ја загуби трката, „Парамаунт“ започна сеопфатна кампања за да се врати во игра. Компанијата поведе јавна понуда за акциите на „Ворнер Брос“ и се закани со битка за полномоштва на следното годишно собрание. Наедно таа лобираше кај регулатори и политичари, вклучувајќи го и претседателот Доналд Трамп, при што Елисон повеќепати отпатува во Вашингтон за да го изложи својот став.

По повеќекратни одбивања од „Ворнер Брос“, „Парамаунт“ ги измени условите на понудата. Тие вклучуваа лични гаранции за 45,7 милијарди долари сопствен капитал од фонд основан од таткото на Елисон, Лери Елисон, претседател на „Оракл“ (Oracle Corp.), еден од најбогатите луѓе во светот и сојузник на Трамп.

„Парамаунт“ исто така вети дека ќе му исплати 2,8 милијарди долари на „Ворнер Брос“ за да го раскине договорот со „Нетфликс“, како и дополнителни 7 милијарди долари доколку спојувањето не ги добие потребните регулаторни одобренија.

Компанијата во четвртокот соопшти дека за договорот има обезбедено кредити во износ од 57,5 милијарди долари од Банката на Америка (Bank of America Corp.), „Ситигруп“ (Citigroup Inc.) и „Аполо глобал менаџмент“ (Apollo Global Management Inc.). Претходно трите институции имаа обезбедено 54 милијарди долари.