.webp){kind=icon}
Дваесетина компании добиле сертификат за учество на тендерите на агенциите на НАТО, но прашање е колку од нив успеале да склучат некаков договор досега. На оваа тема во гостувањето на Блумберг Адрија ТВ говореше Владимир Анчев, државен секретар во Министерството за одбрана.
„Интересот на македонските компании не можеме да речеме дека е мал, но претходната година, 2022-та, нашите компании беа соочени со многу поголеми предизвици како резултат на светската енергетска криза. Претпоставка на Министерството е дека токму енергетската криза придонесе да имаме помал број на компании“, вели државниот секретар.
Анчев објасни дека при крајот на минатата година била направена анализа на состојбите во однос на мерката.
„Увидовме дека имаме некакви тешкотии, но се обидуваме да ги анимираме нашите компании да го започнат ова патешествие, што, секако, е еден долг процес. И ние не сме задоволни од резултатите што се постигнати и токму затоа, кон крајот на годината, се формира еден поткомитет што има специјална задача да подготви акциски план за соработка на македонските компании со агенциите на НАТО, преку кои се вршат овие набавки. Во поткомитетот ги вклучивме и претставниците на стопанските комори“, истакна Анчев, според кого веќе почнуваат да се гледаат првите плодови од директната соработка.
Целиот разговор со државниот секретар во Министерството за одбрана погледнете го на видеото во рамките на објавата.
