Рударската индустрија креира околу 8.000 работни места, но платите се повисоки дури и до 35 отсто од просечната македонска плата, а кај поголемите рударски комплекси и многу повисоки, вели во интервју за „Блумберг Адрија“ Ивица Талевски, претседател на Македонската асоцијација на рударство при Стопанската комора.
„Суфицитот што го остварува економијата преку извозот од оваа индустриска гранка е околу 250 милиони долари, а 75 отсто се од извозот на металични минерални суровини“, посочува Талевски и додава дека инвестициите во рударството во одредени години се до 30 отсто од вкупните инвестиции во македонската економија.
Учеството во индустриското производство е од 10 до 12 отсто, а во БДП е околу 2 отсто.
„Минатата година беше предизвикувачка, како за светската така и за македонската економија, вклучувајќи го и рударството. Се зголемија оперативните трошоци и стабилноста на производството. Тоа особено дојде до израз кај помалите компании, односно кај неметаличните производи, како што е вадење камен, додека кај металичните производи не е забележан пад на производството, туку има раст од 3,7 отсто“, заклучува Талевски.
Дури 35 отсто од вработените во оваа индустрија се постари од 50 години и во тој правец се вложуваат напори за инвестиции во делот на кадри преку дуално образование и стипендирање средношколци и студенти во делот на техничките науки што недостигаат.