.webp){kind=icon}
Потенцијалот на префрлање на вработени од јавниот во приватниот сектор треба да се анализира на ниво на дејности во македонската економија, со оглед на сознанијата дека за нивнa транзиција е потребно да се финансираат програми за преквалификација, доквалификација, обука и дополнителни форми на стекнување вештини, и овој процес заеднички треба да биде платен од двете страни.
„Значи, нема висок перформанс на администрацијата во бизнис-секторот ако тие луѓе не се надградуваат во нивниот капацитет“, вели во интервју за „Блумберг Адрија“ Леонид Наков, професор на Економскиот факултет при УКИМ.
Во Македонија има130 илјади административци, а просечната старост е 46 години. Некои од младите луѓе сопствената ориентација ја перципираат во администрацијата со оглед на релативната стабилност на тоа работно место. Сепак, тие сакаат да видат процес на градење професионална администрација, која треба да има три суштински компоненти.
„Тука влегуваат одговорност во извршувањето на функциите, не само одговорност кон основачот на институцијата туку и кон корисникот на услугата, потоа респонзивност, односно потенцијал континуирано да се комуницира со корисникот на услугата за обезбедување поквалитетна услуга, и технолошко осовременување на администрацијата“, додава Наков.
Кога се анализира администрацијата, главно прашање треба да е квалитетот, многу повеќе од квантитетот, со оглед на фактот што неаналитично кратење на работните места ќе го намали и потенцијалот кон додавање вредност кон корисниците на административните услуги за бизнис-секторот и граѓаните.
