Пазарот за мебел во Македонија е заситен поради засилената побарувачка за време на пандемијата на ковид-19. Наредниот период се очекува стагнација, вели во интервју за „Блумберг Адрија“ Орце Николов, директор на компанијата „Про-дизајн“.
Најголема неизвесност за процесот на производство, вели тој, се цените на енергентите, а инфлаторните притисоци се очекува да продолжат и понатаму.
„Кај некои суровини цените се покачија од 20 до 90 отсто. Можеби и двојно. Сепак, на крајниот производ не е толку значително поскапувањето, но раст е можно да има и натаму, бидејќи главните ресурси, енергијата и дрвото, се значително поскапени“, вели Николов.
„Дополнително негативно на побарувачката ќе влијае и затегнувањето на монетарната политика. Скапите кредити се сè поголем проблем и за развој и ширење на бизнисот“, додава тој.
„Кредитите веќе се поскапени. Од 2,7 отсто каматни стапки се кренати на 5,5 отсто. Ретко ќе најдете сега евтин кредит. Неопходен е и раст на платите, значи секако ќе се соочиме со зголемени трошоци во работењето. Цената на струјата неколкукратно се зголеми, така што се намалува веќе и профитабилноста на самите компании. Цените на крајните производи, пак, не се толку зголемени како трошоците“, посочува тој.
Планот за развој на оваа индустрија Николов го гледа во реорганизација, зголемување на продуктивноста на компаниите и освојување нови пазари.
Целиот разговор со Орце Николов погледнете го во видеото во рамките на објавата.