Некои од домашните трговци се обидоа да „јаваат“ на бранот поскапувања на енергентите и струјата, односно да ја зголемат својата профитабилност на товар на граѓаните, вели во интервју за „Блумберг Адрија“ даночниот експерт Павле Гацов.
„Ова е интересна инфлација, ваква инфлација во учебниците по економија не сме среќавале, обично побарувачката била таа што причинувала зголемување на цените. Се разбира, многу од економистите, а особено оние што се 'политички економисти', ова ќе го оправдаат само со зголемување на цените на струјата и енергентите, што би рекле дека инфлацијата е увезена. Инфлацијата има и домашни димензии. Очигледно на овој бран на поскапувања на енергентите и електричната енергија се обидоа да 'јаваат' некои од домашните трговци, односно да ја зголемат својата профитабилност на товар на граѓаните и многу од тие поскапувања имаат доза на неоправданост, односно на претераност. Така што во таа насока очекувам расчистување на оваа, условно да кажам, инфлациска магла во следниот период. Точно е дека инфлацијата се намалува, има тренд на намалување, но последниот податок на кумулативна основа за 12 месеци е сепак двоцифрен, 10,7 проценти е кумулативната инфлација, но ако следиме само за првите три месеци, кај цените на мало дури имаме негативен раст од 0,1 отсто, што се разбира е добар сигнал дека во наредниот период сепак ќе има некаква оддишка во овој инфлациски притисок“, вели тој.
Гацов во интервјуто зборува и за ефектите од антиинфлаторните политики на Владата и Народната банка, а се осврнува и на нето-приходот во буџетот од ДДВ, кој во првите два месеца има пад и покрај растот на цените. Според него, тоа укажува на системски пропусти, зголемување и на сивата економија, но е знак и дека граѓаните штедат.
„За првите два месеца имаме пад на собирањето на приходите од ДДВ за 6,3 проценти, што е сериозен пад. Зборувам за нето-приходот од ДДВ. Но, од друга страна, сите други јавни приходи имаат повисок раст, во најмала рака, од инфлацијата. Падот на собирањето приходи по основа на ДДВ всушност покажува определени системски слабости. Очигледно дека некој во услови на неконзистентна даночна политика, во смисла на непроверка на наплата на јавните приходи, не издава фискални сметки. Има и многу други причини. Произлегува дека многу повеќе од парите се трошат за основните животни потреби, а таа стапка е пониска и собира помалку приходи во буџетот, што значи дека луѓето штедат, не ги трошат оние пари за полуксузни стоки што се оданочуваат со 18 проценти. Мислам дека УЈП треба да се позанимава со сериозна анализа, да прави проверки на терен, едноставно да се отвори сериозен фронт против сивата економија за да се подобри и овој сегмент од собирањето приходи“, вели Гацов.