.webp){kind=icon}
Една фабрика во Скопје и најмалку уште три во Штип треба да отвори тајванската компанија „Јагео“ (Yageo), која доаѓа во Македонија.
„Овде станува збор за најголемата гринфилд-инвестиција од осамостојувањето на државата“, вели Јован Деспотовски, директор на ТИРЗ.
Деспотовски додава дека важен е трансферот на технологии што очекува да се случи од Југоисточна Азија кон овој дел на Европа, односно не само Македонија туку и целиот регион да има бенефиции.
Компанијата е важна алка во снабдувањето глобални брендови, како што се „Епл“ (Apple) и „Тесла“ (Teslа). Тоа значи дека Македонија и регионот на Југоисточна Европа стануваат важен дел од овој синџир на снабдување.
„Трката не беше едноставна, бидејќи за инвестиција од 205 милиони евра нормално дека и конкуренцијата е посериозна, а Македонија беше во конкуренција со Србија и Хрватска, и иако бевме најмали, сепак ги убедивме инвеститорите дека имаме капацитети успешно да ја реализираме оваа инвестиција“, рече Деспотовски во интервју за „Блумберг Адрија“.
Деспотовски најавува и дека голема македонска компанија, чие име ќе биде објавено во мај, ќе инвестира во зоните, но дека сега не може да се споделат информации за кој инвеститор станува збор, со оглед на тоа што компанијата котира и на Македонската берза.
„Тоа е нова развојна фаза на зоните, со поголем фокус кон домашните средни и големи компании, но веќе има интерес и од компании од регионот“, додава Деспотовски.
„Бидејќи станува збор за високотехнолошка компанија, прашањето за платите не беше тема околу која би имале сериозни разлики со инвеститорите во фазата на дискусија. Бруто-платата ќе биде околу 1.200 евра, тоа се очекувањата, а во однос на достапната работна сила, Македонија, со Србија и Албанија, е дел од иницијативата Отворен Балкан, која подразбира и поедноставено движење на работната сила“, вели Деспотовски.
