.webp){kind=icon}
Во изминатите три дена, колку што функционира Македонската берза за тргување со електрична енергија, просечните цени се приближно колку тие што ги гледаме на европските пазари. Поточно, на референтната берза за унгарскиот пазар Хупекс, вели во интервју за емисијата „Зум ин“ на „Блумберг Адрија“, Симон Шутиноски, управител на МЕМО АД.
„Можам да заклучам дека првиот ден имавме истргувани 256 мегават-часа во еден правец и со некоја просечна цена од 122,3 евра по мегават-час. Вчера имавме зголемен волумен на тргување од 316 мегават-часа, со добиена целост од 13,5 евра по мегават-час. Денеска се истргува волумен од 235 мегават-часа, цената е тука некаде“, додава Шутиноски.
Тој појаснува дека во овие први денови, како и денеска, во некои часови се постигнала најниска цена 44,29 евра по мегават-час, а највисоката била некаде околу 120 евра.
„Волуменот што се тргува во првите денови, очекувано, не е премногу голем, затоа што ова е период на приспособување на портфолијата на трговците и на снабдувачите и на сите што продаваат и купуваат електрична енергијана берзата. Тоа што сакам да го истакнам, што можеме да го увидиме од овие први три дена на тргување, е тоа што има голема понуда на енергија“, додава Шутиноски.
Од друга страна, пак, иако фотоволтаиците се добар извор на електрична енергија, сепак Крумислав Рафајловски од ЕДС смета дека со олеснувањето на процедурите во последниот период за обезбедување неопходни податоци и документи за изградба за фотоволтаични системи, енормно се зголемило производството на струја од фотоволтаици, со што се намалила пазарната цена во дневните часови кога се произведува енергија од фотоволтаици, и тоа не само кај нас туку и во соседните земји.
„Тоа, да речеме, од една страна е корист, од друга страна проблем на пазарот. Пазарите веќе ја перципираат зголемената понуда на струја во часовите кога произведуваат фотоволтаиците и цената во тие часови драстично опаѓа. Проблемот е што може да се случи инвеститорите во фотоволтаични централи да не можат да си ги исплатат средствата што ги имаат земено за изградба на фотоволтаични централи, односно планираната цена што очекувале да ја добијат со продажба на електричната енергија. Сега цената е многу пониска отколку кога ги добиле лиценците за изградба на фотоволтаичните централи за време на кризата, кога цената достигнуваше и до 800 евра од мегават-час, во споредба со сегашните 80 евра во дневните часови“, појаснува Рафајловски.
Тој додава дека затоа во Стопанската комора на Македонија моментално се работи на иницијатива за складирање количества на електрична енергија, односно се работи на начин како оваа енергија да се складира, а решение за тоа се батериите.
