.webp){kind=icon}
Од наесен aвиокомпанијата „Визер“ ќе воведе нови линии од Скопје кон Љубљана и Луксембург, вели меѓу другото во интервју за „Блумберг Адрија“ директорот на „ТАВ Македонија“, Неџат Курт.
Курт посочува дека новите авиолинии и авиокомпании што влегоа во македонскиот авијациски пазар (Франкфурт со „Луфтханза“, Сплит со „Кроација ерлајнс“, Осло со „Норвеџиан“, сезонски летови од Манчестер и Лондон-Гетвик со ТУИ и Белград со „Ер Србија“) ќе дадат дополнителен придонес за зголемување на бројот на патници и летови од аеродромите во Скопје и во Охрид.
Неџат Курт
Bloomberg Adria
„Покрај тоа, имаме и веќе постојни дестинации за кои ќе се зголеми бројот на редовни линии. Да речеме, ако досега имало летови двапати неделата, сега ќе има три-четири пати неделно“, вели Курт.
И во време на економска криза, висока инфлација и намалена потрошувачка моќ, сепак се чини дека некои од граѓаните, барем оние што можат, издвојуваат дел од потрошувачката кошничка за патување.
Македонските аеродроми бележат раст на бројот на патници. Во првиот квартал од 2023 година, споредено со истиот период лани, бројот на патници е зголемен за 41 отсто. Раст за 15 отсто, пак, има во споредба со претпандемиската 2019 година, која се смета за референтна во авијацијата.
Bloomberg Adria
„Поминавме долг период на пад на авиосообраќајот за време на ковид-кризата, кога имаше рестрикции. Сега се враќа довербата во авијацијата и во патувањето. Периодот на ковид-19 заврши, начинот на размислување на луѓето се промени, можностите за патување се зголемија и верувам дека и во иднина ќе имаме повеќе можности за патување и дека луѓето ќе сакаат да патуваат на места каде што не патувале претходно“, вели Курт.
Инаку, најфреквентни дестинации од меѓународниот аеродром во Скопје, според статистиката за патничкиот авиосообраќај на „ТАВ Македонија“, за првата половина од 2023 година биле Истанбул, Базел Милуз, Цирих, Дортмунд и Виена.
Топ пет земји со директни летови, пак, се Германија, Швајцарија, Турција, Италија и Шведска.
