Во исклучително лошо економско опкружување, раст на каматните стапки и долгови на стопанството, Владата сака да се спаси од кризата и да ја пополнува буџетската дупка на грбот на компаниите, вели во интервју за „Блумберг Адрија“ претседателот на Стопанската комора на северозападна Македонија, Менди Ќура, критикувајќи го законот за екстра-профит на компаниите или т.н. данок на солидарност.
Новата давачка, која, како што вели, се носи ад хок, е незаконска и недемократска, смета Ќура и најавува жалби до Уставниот суд.
„Овој данок да се носи во ваков ’жежок’ период за стопанството е со цел да се пополни дупката во буџетот и да се соберат 80 милиони евра. Овие мерки не се адекватни, видовме и од УЈП дека околу 140 милиони евра од даноци не се собрани од компании. Наместо да се ловат неплаќачите на даноци, со овој данок им се земаат средствата на компаниите што работат легално и ги планирале тие пари за инвестиции, нови работни места итн.“, вели Ќура.
Според Ќура, ова е дополнителен товар за стопанството, особено во време на економска криза и постојан раст на каматните стапки. На овој начин, според него, се казнуваат редовните плаќачи на даноци што го полнат буџетот.
Дополнителен притисок, како што вели тој, е и растот на ДДВ.
„Сега се предвидува зголемено ДДВ и на околу 1.500 артикли, што е дополнителен товар за компаниите. Владата наместо да нè извлече од кризата, се труди сама да се извлече од својот дефицит на грбот на компаниите преку даноците. Еве, пред неколку дена имавме и зголемување на ДДВ во делот на електричната енергија, се предвидува и зголемување на други производи, што дополнително ќе биде проблем за функционирањето на компаниите и за нивната ликвидност, односно тоа ќе ги натера компаниите да затворат. За жал, немаме некоја можност да се извлечат од кризата“, вели претседателот на Стопанската комора на северозападна Македонија.
Растот на каматните стапки, пак, ги зголемува долговите на компаниите. Според Ќура, најпогодени се малите и средните претпријатија.
„Веќе имаме затворени компании, околу 9.000 компании веќе се затворени во овие седум месеци и мислам дека овој тренд ќе продолжи, особено на микро и малите компании, кои работат преку кредити што не можат да ги враќаат. Стопанството во моментов е во голема криза и мислиме дека Владата треба да преземе други чекори да им помогне на малите компании, а на да се зголемуваат давачките“, вели Ќура.
Инаку, и Стопанската комора на Северна Македонија најави дека ќе бара уставно преиспитување доколку не се стопира предлог-законот за данокот на солидарност. Оттаму реагираа дека законското решение не претставува усогласување со директивите и со регулативите на ЕУ, туку, напротив, тоа е нивна злоупотреба.