Приносите на мед од година на година се сè помали, алармираат македонските пчелари, посочувајќи дека климатските промени и нелојалната конкуренција се меѓу главните закани за пчеларството.
Медот го има сè помалку, а цените се сè повисоки.
„Приносите се драстично намалени во последната декада и тоа се чувствува не само кај пчеларите туку генерално во земјоделството, во кој било сектор. Зимата сега почнува многу подоцна, зимите се многу топли, а напролет, пак, кога во април почнува вегетацијата, нектарењето, тогаш обично се случува температурите да паднат под нула и целата вегетација да ја снема, па тогаш сме принудени да ги прихрануваме пчелите. Но во храната што ја даваме ние и нектарот од растенијата има огромна разлика. Годинава проблем направија и дождовите, кои дополнително влијаеја на приносите на пчеларите“, вели Венче Билбилоски, претседател на пчеларското здружение „Матица“.
За разлика од лани, според Билбилоски, годинава приносот е подобар, но далеку е од некое задоволително ниво. Дополнителен предизвик, пак, е и економската криза.
„Самата инфлација, недостигот од храна што ние ја употребуваме како ресурс за пчелите, растот на цените на енергетските ресурси, кој ги поскапува сите трошоци, сè се одразува на производството. Затоа и цените растат, а приносот од година на година опаѓа. Иако цената што ја правиме е приспособена да ги покрие само основните трошоци, се оди со многу мала заработувачка, сепак инфлацијата си го прави своето и тоа се гледа во побарувачката. Луѓето не можат да си дозволат да купуваат како порано, ако порано некој купил пет тегли мед, сега ќе купи една“, вели Билбилоски.
Билбилоски посочува дека за разлика од пред неколку години, медот е дваесет-триесет отсто поскапен. Евтиниот мед на пазарот, пак, као што посочува тој, треба да е аларм дека станува збор за фалсификат.
„Цената на одредени пазари, патишта и продавници и дуќани е многу ниска, а тоа се должи најверојатно на тоа што медот не е вистински, односно се прави со одредени доработки, кој ние го нарекуваме пекарски мед, со разни сирупи, додатоци итн. Неговата цена е драстично помала. Ако реалната цена на медот е 600 денари, некој го продава за 200 денари. Но, потрошувачот може да знае дека не купува мед, дека купува некаков сируп на кој не му го знае потеклото. Иако ние пчеларите се трудиме да произведеме повеќе, климатските промени не дозволуваат. Но во текот на тој процес имаме одредени субвенции од државата, но тоа не е доволно“, вели Билбилоски.
Претседателот на здружението „Матица“ потенцира дека од тој аспект мора да се зајакне контролата врз производителите на т.н. фалсификуван мед.
Што се однесува до бизнис-климата во Македонија за пчеларството и поддршката од државата за развој на овој сектор, Билбилоски вели дека освен директна финансиска поддршка, неопходни се долгорочни стратегии.
„Секоја помош е добредојдена. Секако, субвенциите се добредојдени, но има работи што треба да се изменат на глобално ниво. На пример, да се води сметка за зголемување на зелените површини, пошумување, садење медоносни растенија, што може да се организира на пример и во соработка со училиштата итн.“, вели Билбилоски.