.webp){kind=icon}
Атрактивни локации за градба во Скопје има сè помалку - тоа е една од причините зошто цените на недвижностите не паѓаат и покрај растот на каматните стапки за станбени кредити, вели во интервју за „Блумберг Адрија“, градежникот Никола Велковски.
Дополнителен притисок прават и цените на градежните материјали и дефицитот од работна сила.
Bloomberg Adria
„Не може прецизно да се каже како ќе се движат цените. Станови во продажба има помалку на пазарот, намалени се и одобренијата за градба. Тоа се должи на дефицитот од добри локации за градба, а на тоа што веќе се гради градежниците се обидуваат да ја држат цената поради цените на градежните материјали и скапата работна рака поради дефицитот од работници. Без разлика што голем дел купци веќе реагираат на високите камати, неповолните услови за кредитирање итн., побарувачка сè уште има. Иако добро знаеме дека 30-40 отсто од становите во Скопје се празни“, вели Велковски.
Заклучно со вториот квартал од годинава, цените на недвижностите се зголемени за 12,9 отсто.
Bloomberg Adria
Улога во растот на цените, според Велковски, има и растот на цените за откуп на земјиште.
„Сега се појавија фирми што работат исклучиво со изградба на станови и не работат повеќе на деловни простори, бидејќи не се продаваат, не се издаваат. И тие што инвестираат во станбена градба се инвеститори фирми што не се градежни, а инвестираат во овој сектор бидејќи е профитабилно. Сопствениците на земјиштата на градежните парцели сфатија дека сега има конкуренција, се бараат слободни локации, па и тие ја кренаа цената. Во овој период имаме и недостиг од јавни инвестиции и голем дел фирми се осврнаа кон градба на станови, кои сè уште се продаваат, можеби и на среќа... Но мислам дека високите цени ќе потраат“, вели тој.
Bloomberg Adria
Поради големата понуда на станови за издавање, пак, Велковски вели дека веќе нема математика ниту во купувањето стан со цел да се издава под кирија.
„Веќе се чувствува затегнатата монетарната политика. Иако има побарувачка, не е толку голема како порано. Периодот на продажба е веќе продолжен. Една причина е што каматните услови се поригорозни и неповолни, а второ, веќе не е толку профитабилно да купиш стан за да го издаваш. Има голема понуда на станови за издавање и забави купувањето станови и од тој аспект“, вели Велковски.
