Во согласност со новите европски регулативи, компаниите од 2025 година имаат обврска според која секое ново шише од пластика мора да има 25 отсто рециклиран материјал и тоа е еден од двигателите на новите инвестиции, вели во интервју за „Блумберг Адрија“ Михаил Матески, претседател на Македонската асоцијација за управување со отпад.
„Во наредните две години компаниите треба да се свесни дека сè што се пласира како пакување во шише од пластика мора има 25 отсто рециклирана содржина. Поголемите компании се свесни, додека помалите не се и затоа апелираме да се приклучат на тие текови“, додава Матески.
Многу европски држави веќе воведуваат систем на кауција, кој подразбира да има машина во која ќе ја оставите празната амбалажа и ќе добиете одреден паричен износ.
Тој посочува дека сè што не може да се рециклира е можност за алтернативен извор на енергија.
Во Римини, Италија, се одржува саемот „Екомондо“, кој е традиционален саем особено за италијанската индустрија за животна средина, но, како што вели Матески, е значаен и за целиот наш регион.
„Она што го забележуваме е трендот што постои во изминативе пет години во Европа, а тоа е циркуларната економија за справување со еднократната пластика и од енергија во отпад. Тоа се главните содржини на саемот ’Екомондо’“, вели Матески.
Македонските компании треба да ги следат тие трендови и да бидат максимално вклучени, односно новите технологии да ги вклучат во секторот за управување со отпад во Македонија.
Важно е дека секој граѓанин мора да биде свесен дека отпадот не е отпад, не е ѓубре туку е ресурс, и дека вистинскиот начин во циркуларната економија е секој производ по секое искористување да стане друг производ или да биде искористен за друга намена, како што може да биде енергија од отпад.
„Во таа смисла во Македонија се завршени доста работи, меѓутоа има и многу нешта што треба да ги направиме. Во Македонија законите се усогласени со директивите на ЕУ, особено во делот за управување со отпад од пакување она што недостига е реализација на терен“, вели Матески.
Тој појаснува дека локалните самоуправи и јавните комунални претпријатија најмногу треба да се реформираат за да се приклучиме кон овие текови заради тоа што интеграцијата во Европа подразбира сето тоа да биде комплетно решено.
„Заостануваме доста, меѓутоа имаме време од неколку години доколку навистина се фокусираме на овие теми, да направиме нешто сериозно“, заклучува Матески.