Буџетот за 2024 година нема да обезбеди економски раст на нивото на проекциите на Владата, а некои од клучните проблеми, меѓу другото, се непродуктивните трошоци, вели во интервју за „Блумберг Адрија“ Горан Ѓорѓиевски, претседател на Агробизнис-комората при Сојузот на стопански комори.
Тој посочува дека кабастата јавна администрација и државните загубари со години се товар за државната каса.
„Повторно се оди во една димензија на зголемување на буџетот, како што се случува секоја година, и повторно тие финансии одат во непродуктивни трошоци. Суштински проблем во нашата држава практично е администрацијата. Имаме голема превработеност во администрацијата и доколку направиме споредба со некои држави што се слични по географски обем и број на жители како нас, еве на пример Словенија, таму има 80.000-90.000 вработени, кај нас има 160.000 вработени во државната администрација, што претставува огромен товар за буџетот. Ние сметаме дека клучот е таму – намалување на бројот на вработени, со што ќе останат многу повеќе финансии во буџетот за економските активности и начини со кои може да му се помогне на бизнисот во нашата држава. Апсолутно, тука би ги ставил и јавните претпријатија што креираат стотици милиони евра годишни загуби („Македонски пошти“, „Македонски шуми“, „Железници“ итн.), со самата нивна рационализација, а нема подобра рационализација од приватизација, ќе заштедиме околу 100 милиони евра, а ќе имаме и трансфер на тие вработени во приватниот бизнис, бидејќи знаете дека во овој момент има голем недостиг на пазарот на трудот во однос на човечки ресурси“, вели Ѓорѓиевски.
Блумберг Адрија
Ѓорѓиевски посочува дека бизнис-секторот во моментов е во стагнација, критикувајќи ги и владините антиинфлаторни мерки, како замрзнатите цени. Тој нагласува дека инфлацијата сè уште не е победена.
„Компаниите стагнираат бидејќи многу е тешко да се дојде до финансии, каматите се високи и бизнисите се замрзнати во нивните економски активности. Начинот на кој се справува државата со инфлацијата, занемарувајќи ги пазарните вредности и принципи, е несоодветен начин на економските проблеми. Бизнисот не смее да биде толку изложен на сите влијанија што доаѓаат однадвор, сметаме дека може да се преземат поквалитетни решенија“, вели тој.
Блумберг Адрија
Според Ѓорѓиевски, неопходни се понасочени мерки за поддршка на ранливите категории.
„По одмрзнувањето на цените, пазарот повторно ќе ги одреди цените и ќе се случи несоодветен раст на цени, кој ќе биде притисок на потрошувачите. Неопходно е да се цели на финансиска помош кон ранливи категории на граѓани, за целиот притисок да не падне врз прехранбената индустрија, а и помошта кон тие групи да биде поголема. Со овие мерки на пример како гарантирани цени се заштедуваат 1.500-2.000 денари по семејство, а доколку се цели на пример на мерки како 10.000 денари за едно семејство, ем помошта ќе биде поголема за оние на кои им треба, ем притисокот и штетата нема да паднат само на прехранбената индустрија“, вели Ѓорѓиевски.
.webp){kind=icon}
