Скапи кредити и заострени услови за финансирање од банкарскиот сектор е тренд што ја обележи годината што изминува. А во вакви околности бизнисите се стремат кон финансиска поддршка од грант-проекти што нудат неповратни средства за развој.
„Но клучно за донаторите е да аплицирате со иновативни идеи и општествено одговорни проекти“, вели во интервју за „Блумберг Адрија“ Зоран Стојковски, основач и извршен директор на „Проефект Иново“, компанија што му нуди консултантски услуги на бизнис-секторот за привлекување донатори.
„Она што можеме најчесто да го видиме на нашите обуки со бизнис-секторот, првично е важно компаниите да сфатат што се може да се финансира. Бидејќи најчесто потребата од пари и опрема не е во фокусот на финансирањето на грант-програмите. Често се финансираат иновативни проекти што сака да ги финансира секоја држава или ЕУ. Многу често првичната цел и предизвик ни е да ги рефокусираме компаниите за да сфатат кои се правилата на игра, дека грантовите не се кредити и дека мора да се фокусираат кон тоа што го бара дадениот грант. Заедно со компаниите го дефинираме нивниот интерес, но и што е она што може да се финансира од дадениот грант. Штом го дефинираме тоа, почнуваме со процес на обработка со наративна апликација, заедно со буџет итн. На тој начин кај нас постои нешто што се вика Грант-академија и за два-три месеци доаѓаме до фантастични резултати и прифатени грантови“, вели Стојковски.
Тој потенцира дека исклучително е важно компаниите кога аплицираат да имаат студии за оправданост за одреден продукт што сакаат да го направат или, пак, за некоја иновација да имаат јасен концепт за развој, за да се убеди донаторот дека доколку тоа се финансира, нема да биде добро само за компанијата туку ќе има и пошироко општествено значење и влијание.
„На обуките ние го поминуваме патот на компаниите од почетокот до крајот, до добивањето на грантот, не случајно обуките траат и по три месеци за да може да се соберат сите податоци што ни требаат. Не сите фирми имаат сектори за истражување и развој... Затоа тука како мост помеѓу компаниите и донаторите доаѓаат бизнис-консултантите. Многу често кога некој ви дава грант се бара и пошироко општествено значење. Во тие два интереса измеѓу компаниите и донаторите, ние како консултанти се обидуваме да најдеме најдобар пристап за да се добие грант и добро да се реализира проектот“, нагласи Стојковски.
Стојковски ги посочува и актуелните повици и грантови што во моментов им стојат на располагање на компаниите.
„За нас голем предизвик, не само за Македонија, воопшто за сите држави на Западен Балкан, но и за ЕУ е програмата ’Хоризонт Европа’ – програма што во својата компонента има фокус кон компании што се иновативни и сметам дека таа програма е голем залак, особено за компании што доаѓаат од земјите на Западен Балкан. Имајќи предвид дека имаме фантастично развиени компании од ИТ-секторот што работат на иновативни продукти, токму преку оваа програма може да добијат финансирање, зборувам по неколку милиони евра, за да ги доразвијат или комерцијализираат своите иновации. Сметам дека тоа е клучниот интерес кога зборуваме за донаторите што се присутни на Западен Балкан. Постои и ЕУ, неколку механизми, едниот е регионален, Инвестицискиот фонд за Западен Балкан, во кој има дел за иновации и за препознавање компании што може да имаат фантастично влијание и добиваат грантови. Сè друго е фокусирано и кон Државниот фонд за иновации, но сега за сега таму е мирно, очекуваме од пролет да почнат нивните три-четири различни грант-програми и секако други фондови што постојат. Крајот на годината е многу интересен со т.н. награди и предизвици, каде што помали стартапи може да се јават за да добијат финансии доколку победат на тој тип натпревари, при што исто така станува збор за неповратни финансиски средства“, вели тој.