Музичкиот бизнис и музичката индустрија за време на пандемијата и потоа претрпеа епски промени, вели Бобан Милошески, сопственик на „Авалон продукција“, во интервју за „Блумберг Адрија“.
„Поскапеа многу работи, па и музичкиот бизнис го искористи тоа за да ги зголеми цените. Но сметам дека овој сектор многу повеќе и многу понеадекватно ги зголеми цените, од она што му се зголеми нему“, вели Милошески.
Тој додава дека тоа доведе до круцијална промена, односно од мапите ги снема турнеите со огромен број концерти.
„Сега, накратко кажано, почна да се свири многу помалку за многу повеќе пари. Или можам да кажам дека артисти што чинеле 250 илјади евра сега чинат 450-500 илјади евра. Истите тие порано правеле по 100-120 концерти во годината, сега прават по 40-50, но со многу повисока цена“, додава Милошески.
Тој потенцира дека тоа реално претставува голем проблем за нашиот пазар и дека како продукција, сепак, се обидуваат да се вратат на шините и да ги следат новите трендови.
Прoмени донесоа и социјалните медиуми, како Спотифај (Spotify), Јутјуб (YouTube), Фејсбук (Facebook), Инстаграм (Instagram).
„Музиката преку овие платформи тотално влезе дома и многу е тешко, особено младите генерации, да ги извадиш оддома и да ги однесеш на концерт. Тие сметаат дека е доволно ако вклучат јутјуб-концерт и го гледаат тоа дома“, вели Милошески.
Тој посочува дека, фигуративно кажано, публиката на повозрасните артисти, од типот на Лени Кравиц, Сантана и Стинг, е навикната да се дотера и да ги гледа на концерт во живо.
Милошески во интервјуто зборува и за тоа со какви предизвици се соочија како продукција при организацијата на концертите на Ерос Рамацоти во салата „Борис Трајковски“ во Скопје, каде што требало да се носат генератори за струја за да може да се одржи концертот, а притоа цел Карпош да не остане без електрична енергија, како и за тоа каква беше организација на концертот на Стинг во БиХ.
.webp){kind=icon}
