Економските текови во Европа, особено во Германија како наш најголем трговски партнер, ќе бидат клучни за движењето на македонското индустриско производство, кое стагнира од почетокот на пандемијата.
Директорката на „Макстил“, Марија Дуковска-Павловска, во интервју за „Блумберг Адрија“ вели дека во поглед на нарачките од странските партнери од почетокот на годината има позитивни сигнали во споредба со лани, но на пазарот и натаму има неизвесност.
Покрај условите за надворешнотрговската размена, како фактор што ќе влијае на перформансите на овој сектор, таа ги посочува и монетарната политика и движењето на каматните стапки.
„Ние директно сме многу поврзани и зависни од тоа како се движи индустријата во Германија, Италија, воопшто во целокупната ЕУ. Она што е позитивно за нас како индустрија е што уделот што го имавме на пазарот во Турција се зголемува, значи барањето и освојувањето нови пазари е нешто кон што треба да се стремиме за да го намалиме ударот или влијанието што го имаме од пазарите од ЕУ. Секако, како ќе се движи и понатаму зависи од многу фактори, зависи од ЕУ, потоа зависи од тоа какви се очекувањата за каматните стапки во текот на оваа година, дали ќе бидат поволни за да го поддржат производството, за да ги поддржат инвестициите што се планирани во текот на оваа година. Конкретно за нас, доколку треба да ја споредиме годинава, да ни биде показател од почетокот на годината за текот на оваа година, очекувам успешна година, со зголемен број нарачки споредено со минатата година. Доколку го споредиме само овој временски период од први јануари до средината на февруари, оваа година имаме приближно 15 отсто зголемување на нарачките споредено со истиот период во 2023 година“, вели таа.
Како главен предизвик за металопреработувачката и челичната индустрија, Дуковска-Павловска ја истакнува и зелената транзиција.
„Всушност, тоа е она поради коешто најголем број земјоделци штрајкуваат низ светот. Во нашиот бизнис нема такви протести, но се чувствува многу барањето за таа зелена транзиција. Да, во ред, ќе се преориентираме, нашето производство на челик од старо железо е всушност зелено производство, а електропечката е она кон кое се стремат и треба да го направат сите други производители на челик, кое е основно барање за имање зелен челик. Меѓутоа, сите овие барања се толку строги, ригорозни, што всушност не се овозможува од самиот старт, значи прво од производството на електрична енергија, да имаме доволно зелена енергија за понатаму целокупното производство да можеме да го карактеризираме како зелено“, вели таа.
Директорката на „Макстил“ потенцира дека за побрза и полесна зелена транзиција е клучна и поддршката на државата.
„На пример, Германија дефинираше стратегија за производство на електрична енергија од природен гас и водород, тоа е она кон кое ќе се движи германската економија. Иста така, таа ја поддржува транзицијата кон зелен челик на два производствени капацитета во рамките на Германија, така што очекувам германската економија да закрепне многу скоро и поради поддршката што ја има од страна на самата држава“, вели таа.