Вештачката интелигенција ги направи сè поатрактивни акциите во технолошките сектор, а особено значаен интерес на пазарите на капитал има за инвестирање во ЕТФ, вели во интервју за „Блумберг Адрија“ Горан Марковски, главен извршен директор на „КБ Публикум инвест“.
„Она што е интересно за ЕТФ од технологија и обем на средства е дека во принцип од почетокот на годинава во ЕТФ-технологија се слеани приближно 90 милијарди долари, што е историски најголем обем на средства. Во принцип, ваков прилив во текот на изминатите петнаесет години воопшто немало. Има зголемување во периодите на 2021 година, кога имаме враќање на ниво од 30-40 милијарди, меѓутоа ваков интерес досега немало. Тоа е првенствено поттикнато од, ајде да речеме, компаниите што се најатрактивни во сегментот на вештачката интелигенција“, вели Марковски.
Сепак, Марковски вели дека големите очекувања за одредени атрактивни компании носат ризик и од разочарувања, потенцирајќи го моментот на формирање балон и пумпање на цените.
„Вие ја спомнавте ’Енвидија’, компанија што веќе има вреднување што е значајно, и оној технолошки индекс Nasdaq има огромни очекувања. Нешто слично што за жал сме виделе е ’Тесла’, која по извесен период имаше и корекција. Во моментот таа е на 50 отсто од вредноста што ја достигна во текот на изминатата година. Веќе сме на почеток на некој процес во кој поради структурата на вложување, она што спомнав, 63 отсто од вкупните вложувања на фондовите се во принцип преку овие ЕТФ, каде што учествуваат голем број индивидуални инвеститори, кои не мора секогаш да имаат и најпрецизни и најдобри анализи и познавања. Така што тие на некој начин веќе го формираат тој меур, кој, за жал, да кажеме и во минатото се случувал и генерално предизвикува т.н. пумпање на цените и во принцип е можно да предизвика одредена нестабилност на долг рок. Меѓутоа тоа е нешто што е актуелно и во принцип е базирано на огромни очекувања кај компаниите. Конкретно, на пример кај ’Енвидија’ очекувањата се дека, од една страна оној раст што го забележаа во минатиот квартал од 600 отсто на добивка, од друга страна 125 отсто раст на приходи, ќе продолжи и понатаму. Меѓутоа, од друга страна, тие високи очекувања многу лесно доведуваат до разочарување, она што веќе го спомнав со примерот на ’Тесла’“, вели тој.
Марковски се осврна и на прашањето кои индикатори се важни при селекција на акции.
„Секој фонд има свои инвестициска политика. Во однос на фондовите што ние ги управуваме, имаме вложување во технолошкиот сектор, меѓутоа кај компании што имаат многу поиздржани показатели. При изборот секогаш се водиме првенствено врз основа на индикатори што покажуваат дали тие перформанси се одржливи на долг рок, како е позиционирана компанијата итн. Односно правиме фундаментална анализа на компании и врз основа на тоа ги донесуваме соодветните одлуки кои компании да бидат присутни, дали да се чуваат, дали да се продаваат акциите итн.“, вели тој.
Осврнувајќи се на ефектите од монетарната политика во пресрет на седницата на ЕЦБ и обраќањето на првиот човек на Фед, Џером Пауел, пред Конгресот на САД, Марковски вели дека не очекува намалување на каматите пред втората половина од годината.
„Иницијално, прогнозата на најголем дел од инвеститорската јавност беше дека намалувањето на каматите ќе се случи во почетокот на март, но, сепак, поради последните податоци што дојдоа првенствено во однос на инфлацијата мерена во САД, индикаторите укажаа дека во принцип сè уште е рано за спуштање на каматните стапки, бидејќи првенствено целта на Фед секако е да се обезбеди долгорочна стабилност и од тие причини не сакаат да се оди со рано спуштање на каматните стапки. Во таа линија очекувам да биде и одлуката на ЕЦБ, а од истите причини не очекувам ЕЦБ да го води патот во процесот на спуштање на каматните стапки. Во изминатите денови, очекувано, пазарите реагираа соодветно, односно секоја нова информација што упатува на можно намалување влијае позитивно, додека секоја друга информација за инфлација што значи пролонгирање на намалувањето на каматите, влијае негативно на пазарите на капитал. Генерално, очекувам процесот на спуштање на каматните стапки да се случи кон крајот на вториот квартал и тоа да се одрази соодветно на пазарите на капитал во релаксирање на условите“, вели извршниот директор на „КБ Публикум инвест“.